Parlamentario Besaril a entrega keho na OM contra dos parlamentario di AVP

ORANJESTAD – Parlamentario di partido MEP, Guilfred Besaril a entrega keho di difamacion na dos miembro di parlamento di fraccion di AVP. E keho segun Besaril, ta basa riba un incidente cu a sosode den parlamento diahuebs durante tratamento di e adaptacion di e presupuesto 2014. Mientras cu Besaril no kier haci mencion di e nombernan di e parlamentarionan, pasobra awor na lo ta sospechoso den e caso aki, NoticiaCla.com a compronde di otro fuente, cu ta trata di parlamentarionan Desiree Croes y Melvin Tromp, ambos di e fraccion berde. “Awe mainta 10’or mi a entrega e keho” Besaril a confirma na NoticiaCla.com diabierna atardi.

Mas den dia, fraccion di MEP a emiti un comunicado cu ta describi kico a sosode den parlamento rond di e asunto di Besaril. “Diahuebs den Parlamento un biaha mas parlamentarionan di AVP a demostra un nivel masha baho y bergonsoso. Sra. Desiree Croes y sr. Melvin Tromp a haya ta bon pa acusa Parlamentario di MEP, sr. Guillfred Besaril di violacion sexual di un menor. Algo cu a cai den masha mal tera den hendenan di MEP, pero hasta den hendenan di AVP” e comunicado di e fraccion di MEP a bisa.

Pa loke ta e acusacion contra Besaril, e fraccion a mustra cu “Sr. Guillfred Besaril a duna un desertacion den Parlamento, indicando cu e acusacion contra su persona ta totalmente falso!”. “ Den e mesun desertacion, sr. Besaril a elabora riba su infancia, y un experiencia dificil cu e la pasa aden y kico ta un di e factornan importante cu na un edad relativamente hoben di 18 aña a hibe den e direccion di Husticia y Polis”, E comunicado ta sigui bisa cu “Sr. Besaril tabata un polis cu den su carrera di 20 aña, a traha pa 3 aña den departamento di Droga y Crimen Organisa. Un decision y reto cu e la tuma pa cuminsa duna su contribucion na comunidad di Aruba den combati un plaga cu te e dia di awe ta afecta nos hubentud. Despues den su carera policial, sr. Besaril a traha pa casi 4 aña den e departamento Specialisa di "Kinder- en Zedenpolitie".” Nan ta mustra cu pa por a traha den e departamentonan aki, e oficialnan policial mester pasa un screening riguroso di Procuroria General, Seguridad Nacional y Top di Cuerpo Policial.  “ Den caso cu un hecho asina tabata berdad, hamas sr. Besaril lo por a pasa e screening y traha den e departamentonan aki” e comunicado di e fraccion ta sigui bisa. Fotonan cortesia ArubaAriba.com