Partido politico MAN na Corsou a inicia proceso di regreso di Steven Martina

WILLEMSTAD.- Partido Man ta contento cu e veredicto di corte di apelacion contra di Steven Martina y a bisa cu e proceso ta cuminsa pa regreso di Steven Martina den funcion politico activo bek.

Partido MAN a tuma nota di e veredicto caminda tres huez a dicta cu no tin motibo legitimo, pa instrui Ministerio Publico pa inicia di nobo cu un persecusion penal contra Steven Martina. Esaki despues cu dia 22 di mei 2019 Ministerio Publico a anuncia, pa medio di un comunicado di prensa cu nan a seponer e caso contra Steven Martina.

Manera ta conoci Partido Kòrsou di nos Tur a entrega keho na Ministerio Publico contra Steven Martina, pasobra nan ta haya cu el a actua den funcion como minister contra di e ley di integridad. Na momento cu Ministerio Publico a informa Steven Martina cu dia 22 di februari 2019 lo inicia un investigacion penal contra di dje, el a tuma retiro pa asina crea espacio pa Ministerio Publico haci nan investigacion penal. Despues di exactamente tres luna Ministerio Publico a seponer e caso.

KdnT no a keda satisfecho cu e decision y nan a haci uzo di articulo 15 di codigo penal y apela e decision na corte superior, caminda tres huez a huzga si mester mantene e decision of instrui OM pa continua cu e investigacion penal contra Steven Martina. Awor 22 di october corte superior a dicta sentencia na fabor di Steven Martina, caminda el a indica cu no tin un base legitimo pa obliga OM pa continua cu investigacion penal loke a ratifica e decision di OM, esaki segun partido MAN.

Den e periodo pa termina e trayecto largo pa haya claridad encuanto e caso di Steven Martina, Partido MAN segun nan ta sigui bisa, a encargo Minister Kenneth Gijsbertha, cu ta Minister di Finansa pa e tuma e cartera di desaroyo economico banda di esun di finansa, cu ta un tarea sumamente pisa. Partido Man a acerca Parlamentario Giselle McWilliam cu e peticion, pa e por bay eherce e funcion di Minister di Desaroyo Economico. Banda di esaki MAN a acerca dr. Yves Schoop cu e peticion pa e tuma e luga vacante den parlamento cu a crea door cu sra. Mc William a bisa minister.

Awor cu tin claridad segun partido MAN cu Steven Martina su caso ta definitivamente seponer, MAN lo bay bek den su seno pa trata e veredicto di Steven Martina y tambe pa inicia e proceso pa regreso di Steven Martina den funcion di politico activo.

Cortesia Extra.