Seramento di aeropuertonan na Venezuela afectando Aruba desde diabierna

ORANJESTAD – “ Aruba ta perdiendo entre 30 pa 40 buelo diario (for di Venezuela)” ta e situacion cu director di Universal Aviation, Claudio Stamper a confirma na NoticiaCla.com diabierna merdia. For di diahuebs cu NoticiaCla.com a confirma e noticia aki, e situacion a sigui ‘empeora’ y diabierna a resulta cu ningun avion di Venezuela a yega Aruba. E motibo ta e continuacion di e operacion venezolano pa controla tur avion priva pa nan matricula, droga, documentonan etc. Tanten, nan a sera 7 aeropeurto crucial te ora cu nan termina e operacion aki. Y diabierna mainta, representante di consulado di Venezuela a confirma cu esaki ainda ta andando.” E operacion Cielo Soberano” ta continua, cumpliendo na aeropuertonan di Venezuela” e representante a confirma na NoticiaCla.com. Pa Aruba e la nifica cu diahuebs (e prome dia di e operacion) apenas 5 avion priva a yega for di Venezuela. Diabierna ya caba esaki a bira zero, (0), y e fin di siman aki e ta nifica por lo menos 30 pa 40 avion pa dia (si no ta mas) cu lo no por yega Aruba pa e motibo ey. 

Tabata diahuebs cu consulado di Venezuela a confirma e noticia di NoticiaCla.com di ciere di e aeropuerto di Maiquetia pa avionnan priva. Ta trata di un operacion lidera pa vicepresidente ehecutivo venezolano, Jorge Arreaza, cu diahuebs marduga a inicia na Aeropuerto Internacional Simón Bolívar de Maiquetía, estado Vargas e ‘ Operacion Cielo Soberano’ cu ta forma parti di accionan oficial contra corupcion y narcotrafico.

E operativo ta tumando lugar na e siguiente 7 aeropuertonan: Aeropuerto internacional Simón Bolívar, Aeropuerto de la Chinita,en Maracaibo (Zulia, noroeste); Arturo Michelena, na estado Carabobo (Costa centro-norte); Santiago Mariño, na Nueva Esparta (Extremo noreste); José Antonio Anzoátegui, na Barcelona (Anzoátegui, noreste), Osacra Machado Zuloaga, conoci como aeropuerto Caracas, den Valles del Tuy, y e Aeropuerto Metropolitano na Charallave (Ambos den estado Miranda, sur di Caracas). "E procedimientonan aki, na prome lugar ta coresponde na e Instituto Nacional de Aviación Civil (INAC), cu ta inclui un revision integral di permiso di aeronavegabilidad: E ta implica un revision di tanto e avion, su permiso, sistema di mantenimiento, di su pilotos, licencia, y tambe su permiso di sobre vuelo".

E di dos tipo di inspeccion ta coordina pa e Oficina Nacional Antidroga ONA, "unda cu ta check tur compartimento di e avion incluyendo e parti electronico pa verifica e trazas de vuelo di e avion, pa verifica cu efectivamente nan ta cumpliendo cu e planes de vuelo". Durante e proximo oranan den e 7 aeropuertonan, ta prohibi salida di avionan mientras ta haci e revisionnan. Esnan cu no cumpli (avion y piloto) cu e reglanan lo haya medida contra nan tuma segun marco di e leynan aeronautica y venezolano.