Corte superior ta rechasa keho entrega pa persigui ex minister di Corsou Steven Martina

WILLEMSTAD – Corte Superior ayera a dicta fayo den e keho entrega contra di Steven Martina, caminda cu e tribunal ta conclui cu a pesar di tin sospechonan di culpabilidad, e demandantenan no tin interes directo, pa por haci e tipo di keho aki. Na Hulanda tin un areglo special pa entrega un keho contra di un minister, pero Corsou no conoce esaki den su constitucion.

Dos Santos y Rojer a acudi na Corte Superior pa obliga Ministerio Publico persigui Martina, basa riba e echo cu Ministerio Publico den su decision fecha pa 21 di mei 2019, ta duna di conoce cu a pesar cu tin e motibonan rasonabel di culpabilidad di a faya cu articulo 21 di Ley di integridad, lo persigui Martina condicionalmente.

E decision aki a cay den mal tera, pa motibo cu Ministerio Publico ta indica cu Martina a faya cu ley di integridad loke cu ta castigabel, pero toch lo no persigui Martina y ta duna un periodo di prueba di 1 aña cu e no por comete niun fayo penal.

Durante e proceso den Corte Superior, e tribunal a pidi e miembronan di partido KdNT, pa presenta cu nan statutonan y algun otro aspecto mas. E partido ta cumpli cu esakinan y e tribunal ta conclui cu e demandantenan y e partido no ta autorisa pa entrega keho contra di e Minister.

Pa corte honra e peticion pa persigui un sospechoso, esunnan cu ta haci e peticion mester tin un interes directo pa cu esaki y den e caso specifico aki, esey no ta e caso, e tribunal ta bisa.

E ultimo aki e tribunal a motiva ampliamente dicon e personanan no ta bin na remarke pa haci tal peticion.

Den nan motivacion, Corte a mustra cu na Hulanda tin un areglo special pa e tipo di peticion manera esaki, pa persigui un minister. Na Hulanda esaki ta posibel pa medio di un decreto di Cas Real of un decreto di “Tweede Kamer’.

Den e Constitucion di Corsou no tin e tipo di aplicacion aki. Esaki ta motibo cu e tribunal a rechasa e keho entrega.

Contra di e decision aki no tin posibilidad di apelacion.

Cortesia Extra.