Asesino na Corsou kier a mata su victima ya pa basta dia caba!

WILLEMSTAD.- Te con leu polis a purba detene e homber HR di 46 aña cu ayera finalmente a pone fin na bida di mama di su yiunan na Corsou?. E caso di asesinato den Ordenansweg mester conduci na un investigacion profundo entre otro den cuerpo policial mes, pa sa te con leu a investiga, con a tuma e dama realmente na serio cu su denuncianan y te con leu e ruman homber polis di e sospechoso lo a convence famia, pa no haci denuncia.

Esaki ta e preguntanan cu awe famia di Dayanira Eisden di 25 aña ta sinta cu ne, cu hopi tristesa pa su morto lagando 3 yiu chiki atras.

Dayanira cu e homber R tabatin un relacion basta turbulento. Nan tin algun rato caba cu nan a kibra cu otro, pero e homber tabata menasa e damita aki cu regularidad.

Algun siman pasa el a bay na e wela, caminda Dayanira tabata biba y a bringa cu ne, choke, cu ta e famianan mester a bin cerca y a bringa bek cu ne, pa el a laga Dayanira bay.

Ora Dayanira a bay polis pa haci keho, parce cu e ruman homber di e sospechoso cu ta polis, sea e mes of via di e coleganan a papia cu famia y informa nan cu no por haci keho, pasobra nan tambe a bringa cu R.

Despues a sigui mas menasa te cu diadomingo pasa R a bay busca su yiunan, ora el a mira un homber na e cas. Eynan el a cuminsa cu discusion cu Dayanira y a hinc’e den pecho. Ta danki Dios cu e cuchiu a dal den repchi cu Dayanira a scapa. Polis a conseha Dayanira pa e bay keda den shelter, pa asina nan por coy e tipo ey.

Dayanira no kier a bay Shelter, pero a keda cerca su wela te cu ayera.

Pero e no a sinta keto, e tabata yama polis y recherche for di dialuna, pa sa si a detene e homber. Dialuna polis ta bise cu ta recherche y na recherche e no tabata haya contesta. Nan a keda di yam’e bek pero nada.

Ayera den e oranan tempran di atardi/merdia a core yega un auto na e cas caminda Dayanira tabata. E auto tabata maneha pa un hende muhe cu yiu den auto. Pero e homber parce tabata patras den e auto. Ora a puntra pa Dayanira y e prima lo a mira kico ta pasando, el a bisa e muhe den e auto pa e bay di eynan. Hasta a coy piedra pa manda e auto cu ne. E homber sospechoso a sali for di e auto y a cuminsa tira riba Dayanira cu tabata den balcon para. E dama aki cu su tres yiunan den su cercania a purba bay sconde paden. El a pusha su yiunan pa bay paden, mientras e homber keda los bala riba dje cu a resulta fatal.

E muhe cu tabata stuur e auto lo a spanta y a baha mesora for di auto cu e muchanan cu e tabata cu ne. El a pidie e famia percura, pasobra e no tabata sa kico tabata R su intencion. Pero R na su turno a drenta e auto bek despues di a tira Dayanira y a core bay di e sitio.

Un caso hopi tristo cu a laga e famianan basta indigna. Banda cu nan a perde un hoben, cu a lucha basta pa su bida, pero tambe nan tin e sentimento cu polis a neglisha e caso aki. Y nan kier contesta. Nan ta exigi splicacion di e autoridadnan concerni!

Cortesia Extra.