Gobierno a stop tur negociacion cu Southwest Development (Hard Rock Hotel)

ORANJESTAD - Gobierno a stop tur negociacion cu Southwest Horeca Development NV.  Awe Gobierno di Aruba a manda un carta pa Southwest Horeca Development N.V. den cual nan ta notifica Southwest cu mirando cu nan no a cumpli cu e rekerimientonan di e.o. presenta un Shareholders’ Agreement, un financiamento concreto di e capital di inyeccion (equity financing) y fondonan necesario pa construccion di e proyecto di Hard Rock Hotel & Casino na e localidad di ex-Bushiri, ta termina e acuerdo di opcion pa e tereno y stop tur negociacion cu Southwest.

Tabata fin di augustus 2014 cu Gobierno a bay de acuerdo cu un otro extension mas pa duna Southwest e oportunidad di cumpli cu e rekerimientonan minimo. Esaki despues cu Southwest lo a informa Gobierno cu nan tabatin negociacionnan hopi avansa cu un financiado y cu nan banco local lo tabata dispuesto pa extende e garantia bancario. Debi na no cumplimento Gobierno a dicidi di retira di e negociacion y termina e acuerdo di opcion pa e tereno. Esaki ta nifica tambe cu nan lo colecta e garantia di 2 miyon for di e desaroyadornan.