Director di prison na Corsou ta desmenti cu ta ciudadano den comunidad a percura pa cuminda

WILLEMSTAD - For di despues cu departamento di salubridad a cera cushina di prison na Corsou pa motibo di higiëna, a surgi un bruhacion/tardansa den e sistema di comemento di e detenidonan.

Mesora despues cu e cushina a cera, team di maneho di Sentro di Detenshon i Korekshon Kòrsou a cuminsa busca un plan B y solucion pa e presonan por come.

Diabierna berdad e presonan a come basta laat, debi cu a yega na acuerdo cu e director di un instancia den e oranan laat di atardi, cual ta e instancia cu lo percura pa cushinamento di cuminda pa e detenidonan, pa e proximo dianan. Tur cos riba gasto propio di prison.

Ora e persona en cuestion a yama Director di prison ayera, ya tur cos tabata cla regla y tabata wardando simplemente pa caba di cushina e cuminda, pa asina haci entrega.

Despues cu a termina di cushina ayera, a entrega tur cuminda na prison den “shavernan” special, pa wanta cuminda cayente y na prison den cantina a reparti e cumindanan den e diferente bakinan.

E mesun proceso aki lo sigui den e proximo dianan, te na momento cu tur cos normalisa.

Ta papia aki di 280 cuminda pa e presonan cu un dieta special y 220 cuminda pa e presonan cu ta come normal.

“Na ningun momento so, ningun ciudadano den comunidad no a percura riba nan mes pa cuminda pa prison, cos no ta bay pa loco asina”, segun Director di SDKK, Urny Floran.

Diasbra e presonan a haya nan pan mainta sigui pa cuminda cayente merdia na e orario di come normal. E presonan ta come tres bes pa dia y esey lo no cambia. 

Di otro banda e presonan toch ta rabia ainda, mirando cu a cera e cushina pa motibo di higiena, pero nan ta sinti cu ta e mesun cuminda ta saca for di prison y bay cushina afo, pues no sa si e cuminda ta bon pa nan salud ainda.

E presonan a indica cu e cuminda ta igual, manera cu ta den prison mes a cushina.

Cortesia Extra.