Polis na Corsou ta refuta: no tin caso nobo di violacion di stagiaire

WILLEMSTAD - No tin niun caso di violacion nobo di niun stagiaire! Di forma categorico vocero policial na Corsou, sr. Imro Zwerwer, a reacciona riba e preguntanan   tocante e informacionnan cu ta circula riba e rednan social den cua ta indica, cu lo tin un caso nobo den cual un homber local lo a viola un dama stagiaire. Hasta a indica cu polis a detene e sospechoso, mientras cu e dama a bay Hulanda bek, pero toch for di su cel, e sospechoso lo ta app cu e dama y intimid’e.

E informacion riba e rednan social y cu hasta algun medio di comunicacion a duna atencion na dje, ta saca completamente for di contexto. E vocero policial a sigui splica cu no tin nada di violacion. E caso ta esaki; e sospechoso conoce e victima y nan dos tin un relacion di amistad cu otro. Na dado momento algo a sosode entre e dos personanan, posiblemente e relacion a kibra y e sospechoso a bay caminda e dama ta keda/biba y eynan el a causa destruccion y tambe el a maltrata e dama. Despues di su acto di maltrato y destruccion, el a bay for di e sitio, pero djis despues polis a detene. A deten’e pa destruccion y maltrato y no pa violacion.

Na momento di su detencion tabatin un procedura normal, caminda cu a presenta e sospechoso dilanti di un fiscal auxiliar. A kita tur e pertinencianan personal for di dje y a entrega esaki na e fiscal auxiliar. Sr. Zwerwer ta splica mas aleu, cu e ta kere cu e fiscal lo a lanta un rato y esey tabata e momento cu e sospechoso a logra coy su telefon riba mesa di e fiscal y a cuminsa app, entre otro cu e victima. Pues no ta asina, cu e sospechoso tabata den cel di polis y den su poder tabatin telefon pa e app cu e victima.

E vocero policial no ta na altura si e victima a bay Hulanda of no.

Cortesia: Extra.