Formacion Social - SVT ta continua na februari 2020

ORANJESTAD - Recientemente Minister Glenbert Croes a reuni cu Luitenant Kolonel Sr. van Beekhuizen riba entre otro e continuacion di SVT - Formacion Social, specialmente pa nos hobennan masculino. E proximo trayecto ta continua na februari 2020 y por cuminsa inscribi di awor caba.

Inicialmente Formacion Social tabata concentra solamente riba e hobennan masculino, cu no a termina un scol secundario y cu ta desea un di dos oportunidad real den bida. Den transcurso di tempo e mandatario a encontra cu tin basta hoben, cu por ehempel tin diploma di MAVO, pero cu asina mes no por haya trabou. Pues riba iniciativa di e mandatario y cu aprobacion di Luitenant Kolonel Sr. van Beekhuizen y Luitenant Sr. Kelly di Marina y Arumil respectivamente, pa 2020 e hobennan aki tambe por inscribi y pasa e proceso di transformacion personal den SVT. Y e hobennan cu tin un diploma secundario tin e oportunidad di uni nan mes na Arumil, asina cu nan caba cu e trayecto, semper y cuando ta cumpli cu tur e exigencia- y rekisitonan.

Conhuntamente cu Marina y Arumil ta trahando riba un trayecto di formacion social similar, pero cu enfoke riba mucha muhe. Ora cu esaki ta asina leu, lo haci e anuncio oficial den prensa.

Di awor caba por inscribi. Cantidad di participante ta limita. Acerca Jessica Ras di awor caba na number di telefon 522.5352 of via email info.formacionsocial@gmail.com.