Cambio di ley di Serlimar colga den laira sin fecha pa continua

ORANJESTAD – Un siman despues cu Presidente di Parlamento, Ady Thijsen, un biaha mas a pospone e tratamento di e ley di Serlimar, ainda no tin fecha pa esaki sigui. E motibonan pa cual a cancela esaki, ta hopi. ‘Oficialmente’ e version ta, cu a bira laat y cu den tribuna tabatin ‘desorden’. ‘Inoficialmente’ e motibo ta, cu entre e miembronan di coalicion di Parlamento, no tin suficiente sosten pa pasa e ley. Esaki no obstante cu tur partido di coalicion ta desmenti esaki. Hecho ta, cu algo ta pasando cu e ley no por pasa pa caba.

E MOTIBONAN

Segun Presidente di Parlamento, Ady Thijsen, na www.noticiacla.com, e ta ‘bezig ta considerando, teniendo cuenta cu tur cos y e otro reunionnan publico cu mester tuma lugar’. Otro motibo ta cu parlamentario Ricardo Croes lo ta e yabi den henter e asunto aki y cu e no kier vota, tanten cu no complace riba e otro temanan, manera; pasa ley di cannabis y otro asunto, cu ta regarda cartera di e partido, esta den enseñansa. Informacion cu e portal aki tin ta, cu ainda Minister Otmar Oduber no por caba di convence Parlamentario Croes di e Fraccion di RED, cu e mester vota na fabor di e ley. Ta conoci cu e ultimo aki ta contra di e cambionan proponi den e ley existente, den cual ta regla cobramento pa pueblo, pa comercio, pa turista y pa e clientenan di otro compania, cu no ta Serlimar. Segun reaccion di Croes na www.noticiacla.com, e no kier of por a confirma e ponencia aki. E ponencia ta cu Gobierno di un dia pa otro kier redobla e entradanan di e compania di recoge sushi di nos isla, door di a redobla tambe nan gastonan di operacion na un forma sorpendente. A puntra Croes si e ta e ‘sleutelfiguur’ den e asunto aki y cu si e por a confirma esaki, pero su reaccion tabata cortico. “No, mi no tin (un confirmacion, pa cu si e ta e ‘sleutelfiguur’)”, Croes a bisa e portal aki. 

INTENTO

Manera ta conoci, Gobierno a purba na tres ocasion caba pa pasa e ley adapta di Serlimar, pero a faya di haya sosten mayoritario den tur e intentonan. Tin mas di un Parlamentario den e coalicion MEP-POR-RED, cu no ta di acuerdo cu e cambionan y ni den e forma di maneha di Minister Otmar Oduber. E portal aki a acerca e parlamentario Daphne Lejuez tambe pa confirma si e tambe ta esun cu ta contra di e ley, of por lo menos no ta convenci ainda pa vota pro, pero e tambe a prefera di no duna comentario. Mientras cu gobierno ta mustra cu tur cos ta ok pa cu e ley, y cu ta actuando corecto, tin otro persona ta bisa cu e ley ta uno ‘ilegal’, pasobra un compania Sui Generis no por cobra un "heffing" (impuesto), sino solamente un "Retributie" pa e servicionan presta na e clientenan. Den caso asina e ta bira dificil pa cobra e cobransa via nos sistema di impuesto, cu ta haci e caminda pa yega na e fondo mas largo, complica y casi imposibel.

MAS DOCUMENTO 

Riba dje varios Parlamentario, specialmente di e Fraccion di MEP den Parlamento, a pidi pa mas documento concreto manera ta un "Business Plan" pa Serlimar y pa comparti e cifranan di e gastonan y e entradanan di e compania. Lo kier mira salario y e gastonan mara na operacion. E pensamento ta, cu lo a aumenta e gastonan disproporcionalmente, mescos ta e cantidad di empleado, un flota nobo demasiado grandi di truck mara na un lease di mas cu dobel e prijs di compra, un edificio cu ta costa un dineral pa luna na huur y sin lubida un contract masha lucrativo, pagando un suma riba prijs di mercado na un compania pa dera e envirobalesnan na Ser'i Tijshi, sin cu a pasa un destaho publico.   

 YABI

Pa awor, tur cos ta mustra cu aunke cu e ta nenga di ta e yabi, e voto di Ricardo Croes ta escencial pa e ley adapta aki por pasa den Parlamento. Pero, e mesun Ricardo Croes, cu su partnernan MEP y POR a laga cay na mas di un ocasion, ora cu e kier a pasa e mocionnan den Parlamento, pa urgi Gobierno pa pasa e ley pa legalisa Cannabis medicinal. E mesun Fraccion di RED a purba independisa DPS y ey tambe MEP y POR a bira cara p’e y lag'e mustra kens den Parlamento. Cu tur esaki tumando lugar, diripiente Ricardo Croes a bira importante atrobe y e coleganan a pasa tur e ultimo dianan aki ta "lobby" pisa cerca dje. E lo a bisa su partnernan bon cla, tanten cu e leynan di RED no pasa den Parlamento, no conta cu su sosten den nada, aunke e no ta confirma esaki pa e portal aki.

Ta p’esey mes un di e motibonan menciona pa a cancela e ultimo intento durante e reunion den Parlamento, ta cu e Presidente di Parlamento a opta pa suspende e reunion, net ora cu Ricado Croes mester a hiba palabra. E motibo lo tabata pa evita cu e ta los poco "bom" y haci e bida di e coalicion mas "zuur". E reto ta, cu dia cu Parlamento dicidi pa sigui cu e reunion publico aki, e prome orador na palabra lo ta e mesun Ricardo Croes. 

CAMBIO DEN LEY

Si pasa e cambionan den ley toch, e Parlamentarionan ta somete nos isla na un suma grandi di daño y perhuicio, di acuerdo cu opinion legal di e profesornan di ley. Tambe nan lo ta complica cu mas o menos 100 trahado ta perde nan trabou. E mandatario a bisa dialuna mainta den conferencia di prensa cu si ta p'e, ta continua cu tratamento di e ley mesora, pero e no a bisa nada di e sosten politico cu e no tin den Parlamento pa su famoso cambio di ley.

PRESION

Mientrastanto campañanan fuerte ta tumando lugar di tur banda, pa sea pone presion of convence partidonan den parlamento pa vota sea pro of contra. Di parti di gobierno, a sali video pa convence pa vota pro, opositornan politico ta manda mensahe contra, y e compania en cuestion tambe ta haciendo su parti. Hecho ta cu e interes riba e ley aki ta enorme. NOTA: E potret ta di archivo di noticiacla, di durante e reunion ultimo cu Parlamento a trata e ley di Serlimar.