Pareha Mericano a bishita Aruba pa 24 ora so pa un cena na hotel

ORANJESTAD – Un pareha Mericano a bin Aruba pa 24 ora pa un cena special, y biaha bek pa Merca su manece. E storia aki ta parse un propaganda (advertorial) pa un hotel y su restaurant local , pero e ta simplemente un ‘true story’ di loke a sosode cu un pareha Mericano e fin di siman  aki, y cu noticiacla.com a capta y ta comparti. Loke ta parse un pa hopi di ta un locura, ta netamente loke cu e pareha Mericano Chris y Laura Hawkins a dicidi di haci. Y nan no ta arepenti di a comete e ‘locura’ aki. Tabata e chef ehecutivo di e restaurant envolvi, Matt Boland (The Sunset Grille) cu a post e storia riba Facebook, y cu a hala atencion. 

E IDEA 

Segun Chris, esaki no ta prome biaha cu nan ta tuma e decision pa biaha ‘spontaneamente’, pero si ta prome biaha cu nan ta biaha pa solamente 24 hora y haci’e un biahe internacional. E unico cos extra cu nan a logra haci durante e bishita aki, ta snorkel su manese diadomingo mainta y subi avion bek despues pa nan ciudad di Chattanooga, Tennessee.

BIAHE

Segun Chris, nan tabata cuida su suegra pa e ultimo 3 añanan, cu tabata un peso hopi grandi riba nan matrimonio. Recientemente nan a hinca e suegra den un cas di cuido. Prome cu esey, nan tabatin teamnan cu tabata bin nan cas algun biaha pa dia pa yuda. “Awor cu e capitulo aki a caba, nos kier a scapa pa un weekend y pasa algun tempo nos so” Chris a conta noticiacla.com. Loke a yuda, ta e hecho cu un ex studiante di Chris (Chris tabata maestro 20 aña pasa) recientemente tabata na Aruba y a come na Sunset Grille di Hilton Aruba Caribbean Resort & Casino. Echef ehecutivo di e restaurant esta Matt Boland, ta un amigo personal di Chris y Laura. Segun e studiante, e cena tabata e miho cu el a experencia den su bida. Y tabata Chris  cu a pidi su amigo Matt (e chef) pa ‘take care’ di nan. E experiencia suculento y maravilloso di e studiante a pone nan pensa awor, y nan mes kier a experencia e mesun cena aki, y alabez probecha di gradici nan amigo Matt en persona. Segun Chris, el a yega di bishita Aruba den pasado un biaha, pero su casa no (nan ta casa desde 2016). Durante e fin di siman cu a pasa, su casa Laura a  gusta henter e experiencia y no por warda pa bay bek Aruba pa un vacacion mas largo cu solamente 24 ora. Ora cu a puntra Chris si e locura aki tabata bale la pena, el a bisa “E tabata asinaaaa bale la pena. Nos no por warda pa bolbe Aruba, bishita Hilton y Matt, y claro e hendenan maravilloso di Aruba”. Potret cortesia Matt Boland.