Dos persona hospitalisa ainda di e accidente riba brug Spaans Lagoen

ORANJESTAD – Di e 6 personanan cu a accidenta diasabra anochi riba brug na Spaans Lagoen, 2 ta hospitalisa ainda. Asina vocero di polis Liliana Rasmijn a confirma pa noticiacla.com. Manera ta conoci, tabata dos auto cu a ‘cai’ for di brug despues cu nan a ‘dal den otro’. Segun Rasmijn, na tur tabatin 6 persona envolvi, tur den e dos autonan, di cual 4 a keda interna e prome anochi. Mientrastanto 2 a keda pa observacion ainda. 

CAUSA ACCIDENTE 

E causa di e accidente na prome instante, segun investigacion realisa , ta debi na velocidad halto. Un auto cu tabata core duro, a bay pasa un otro yegando brug, perde control y alcansa e auto  cu mas pasahero (Nissan cora) cu na su turno tambe a perde control y baha for di brug. E otro auto tambe a baha, pero tur dos a haya un diferente situacion. Esun cu a haya mas sla di tur, tabata un mucha di 3 aña y un señora turista cu a kibra su enkel.  

E ACCIDENTE 

Tabata diabierna anochi laat den careda di algo pasa di 10 ora cu melding a bin di e accidente aki, cu na prome bista a spanta hopi hende ora cu a tende cu ‘autonan a cay for di brug’. Mesora varios unidad di bombero, ambulance y polis a acudi na e sitio y a mira e situacion. Danki Dios e caso di heridanan no tabata hopi hopi serio, aunke cu e dos vehiculonan (ambos marca Nissan) a haya hopi sla obviamente. E vangrails a keda destrui pa cual mester a keda drecha den fin di siman. Esaki a pone cu DOW a cera e caminda pa e brug pa e parti ey, pa asina por a laga trabounan continua pa drecha e vangrail.