Alto Comisario Hoo: Polis no ta tolera menasa di morto

MACUARIMA – Polis no ta tolera menasa di morto. Asina Alto Comisario Andrew Hoo a bisa den un comunicado diadomingo. Hoo a haci esaki den cuadro di diferente acontecimentonan. Segun Hoo, por a tuma nota ariba social media diferente menasanan y morto dirigi pa Cuerpo Policial di Aruba. “Como altocomisario di polis mi no ta tolera esaki. Trahando conhuntamente  cu Ministerio Publico nos no ta acepta ningun menasa contra polis. Nos agente policialnan ta eherciendo nan trabou debidamente pa mantene e orden publico di nos pais. Cada miembro policial ta sali tur dia for di su cas pa haci nan trabou di tur dia, nos no ta acepta cu nos polisnan lo bai traha bou presion di un hende of di ningun menasa ni di morto” Hoo a cuminsa na bisa. “Mi kier pa esaki ta un mensahe cla y fuerte pa tur personanan cu tin mal intencion contra di polis”.

MAL INFORMACION DI WEBSITE

Segun Hoo, tambe por a tuma nota cu cierto websitenan di noticia local (No noticiacla.com:red)  ta creando nan mesun noticia y bayendo direccion contrario di e realidad. Informando comunidad robes di loke ta hechonan cu a sosode. “Nos por a tuma nota cu awemainta a tuma lugar un incidente na unda un harley tabata involucra. Un website di noticia ta menciona cu polis no mag di persigui un brommer. Na ningun momento Mando Policia a emiti un informacion na su miembro policial cu tin un cambio den maneho di persecucion, e noticia cu e website aki a duna ta incorecto y no ta cuadra cu berdad”. Segun Hoo, tin un maneho por estricto den e organisacion pa loke ta trata persecucion. Cada polis ta dicidi si e ta persigui e momento ey. Si e manehador di cualkier vehiculo dicidi di no para y no sigui ordo di autoridad e por tin consecuencia pa ambos partido. E manehdor mester ta conciente y sigui ordo di polis. “Si polis bisabo para bo mester para!” E momento cu e manehador dicidi di core pa polis, e decision ta den su man pa e consecuencia cu lo bin despues. “ Nos tin ley y reglanan cu nos mester mantene na dje y polis mester cumpli cu nan. Si no tin ley ta bira free for all ariba nos pais