Premier Wever a papia cu secretario di estado Knops awe

ORANJESTAD - Prome minister Evelyn Wever Croes a papia cu secretario di estado Raymond Knops awe merdia ora di Aruba. Esaki a sosode den un forma di conference call. Mientras cu e contenido di e combersacion no ta conoci, ta confirma si cu e combersacion a tuma lugar. E motibo cu e combersacion ta interesante ta mirando cuanto tension tin entre e dos paisnan aki, unda cu manera premier Wever mes a indica, no tin un, sino dos menasa di aanwijzing riba cabez di Aruba. Y otro siman tin bishita atrobe di CAFT, unda cu mester haya clarificacion riba e 'conseho pa aanwijzing. E reunion telefonico a tuma lugar despues di e reunion di conseho di minister di Reino (RMR). Manera ta conoci, RMR no a trata e tema di aanwijzing pa Aruba, pasobra esaki a keda posponi te e proximo reunion cu ta 22 di november. Aunke mester bisa cu a compronde cu lo a programa un extra reunion di RMR pa dia 25 di oktober, pero mester confirma esaki ainda. No ta inusual cu ta 'planea' un reunion extra. Ta interesante pa sa si a trata e tema di aanwijzing y si a haci palabracionan concreto riba e tema di finanzas publico of si a djis intercambia di pensamento riba e relacion entre Aruba y Hulanda. NOTA: E potret ta uno di archivo.