Premier Wever a ricibi copia di ley di iniciativa pa regla integridad di mandatarionan

ORANJESTAD - Diabierna atardi, Prome Minister Evelyn Wever-Croes a ricibi un copia di e Ley di Iniciativa pa regla integridad di mandatarionan for di man di Parlamentarionan Edgard Vrolijk, Rocco Tjon y Endy Croes   E Parlamentarionan di Fraccion di MEP a traha riba e ley di screening di mandatarionan y a entrega esaki algun luna pasa. Despues di a haci e cambionan sugeri pa Raad van Advies, e Ley di Iniciativa a wordo entrega na Presidente di Parlamento pa e por wordo trata den Parlamento. Diabierna merdia, e Parlamantarionan a entrega un copia di e Ley di Iniciativa na Prome Minister. 

Ley di Screening di mandatarionan ta un di e pilarnan pa construi e fundeshi di Integridad den gobernacion cu regla y codigo di conducta na cual mandatarionan mester atene nan mes na dje. Den e ley ta stipula ki consecuencia tin ora viola reglanan di integridad. Manera Prome Minister a anuncia anteriormente, e ley a keda cla den e di dos mita di aña pa asina e por wordo trata den Parlamento.