Aruba ta cla pa tene su prome 'immerse innovation week'

ORANJESTAD – Futura, Aruba su Lab di Innovacion, hunto cu stakeholders clave na Aruba lo ta organisando e prome edicion di 'Immerse Innovation Week' cu lo tuma luga durante e siman di 28 di october, te cu 1 di november proximo. E prome edicion aki ta un colaboracion entre varios organisacion na Aruba, asina creando un calendar di evento nacional. Durante e siman aki sector priva, NGOs, sector publico, studiantenan, entrepreneurs y inversionistanan, lo bini hunto y organisa/host diferente reunion y workshops riba diferente topiconan den e area di innovacion, creatividad, y sostenibilidad.

Banda di esaki, un concepto nobo y unico - Futura Café - tambe lo wordo lansa durante 'Immerse Innovation Week'. E 'pop-up' creativo aki lo ta den curason di nos centro di ciudad, y lo fungi como un espacio pa reunionnan, workshops, 'brainstorm sessions', y tambe lo tin espacio pa studiantenan y 'life-long learners'. Futura Café ta un iniciativa den colaboracion cu AREA - Aruba Re-Imagined Areas - y e lo ta situa den Caya G.F. Betico Croes 16-18 na e di dos piso (Ex. Access Art Gallery).

Durante e 'Immerse Innovation Week' tambe lo lansa 'SPACES'. SPACES lo brinda e comunidad local, y bishitantenan un experiencia nobo unda cu ideanan cu ta formando nos futuro, lo ta ilustra den un manera innovativo y creativo. Un colaboracion entre organisacionnan, empresarionan, y artistanan visual pa trese conscientisacion riba causanan importante identifica door di Nacionnan Uni y e 2030 Sustainable Development Goals (SDGs) incluyendo Cambio di Clima, Turismo Sostenibel, y Igualdad di Genero. SPACES tin e meta pa stimula creatividad y inspira participantenan pa pensa na un manera diferente, y usa nan imaginacion lo mas posibel. SPACES lo ta habri pa publico entrante 28 di october, te cu fin di aña, y ta situa tambe den Caya G.F. Betico Croes 16-18 na e piso abou.

Calendar di Evento

Manera menciona, diferente eventonan innovativo y creativo lo tuma luga durante 'Immerse Innovation Week', incluyendo entre otro:

SUPERNOVA - un 'pop-up' studio experimental pa mucha muher, y muhernan di tur edad, pa reuni y comparti idea, inspira otro y siña habilidadnan nobo. SUPERNOVA lo kick-off dia 29 di october durante 'Immerse Innovation Week' specificamente pa mucha muhernan di 12 pa 15 aña, y e prome topico lo ta STEM (Science, Technology, Engineering, Math). E meta di e prome sesion di SUPERNOVA ta pa stimula mas mucha muhernan den e caso aki, pa scohe un carera den e area di STEM.

ATECH Conference - ATECH lo ta organisando e di 5 edicion di e conferencia e aña aki, y e topico ta masha simpel pero impactante: 'The Future!'. Durante ATECH lo tin diferente oradornan local y internacional, workshops, y manera semper e 'Start-up Pitch Competition' cu ta mundialmente conoci. ATECH Conference lo tuma luga na Hilton Aruba Caribbean Resort & Casino dia 30 y 31 di october. Tickets ta disponibel online riba: www.atechconference.com

BAZ-RRR - situa den nos centro di ciudad Oranjestad, lo host y organisa diferente sesionnan durante 'Immerse Innovation Week' den BAZ-RRR su 'SDG Brasserie'. Un espacio creativo unda cu SDG 'Goal Keepers' lo wordo invita pa inspira, educa, y intercambia ideanan pa asina envolvi mas hende pa logra e SDGs nan defini pa Nacionnan Uni pa 2030. BAZ-RRR lo ta habri durante ful e siman di 'Immerse Innovation Week'. Sigui nan Facebook page pa keda informa (BAZ-RRR Galleria & Brasserie).

Pa clausura e ‘Immerse Week’ e programa lo wordo ‘taken over’ door di Aruba Island Take Over (AITO). AITO lo duna bishitantenan e posibilidad pa bini den contacto cu e comunidad local, y experiencia nos ‘island life’ por medio di musica, arte, cuminda y mucho mas. Cu diferente actividad y workshops tumando luga durante ful e siman,  e colaboracion aki lo demostra con cosnan grandi, y inespera por wordo logra ora cu diferente plataformanan bini hunto pa un causa comun. Pa mas informacion por bishita AITO su website na: www.islandtakeover.com y keda informa via nan Facebook Page. 

Por ultimo, e ekipo di Immerse kier invita tur entrepreneur, NGO, sector priva, sector publico, maestro/maestra, studiante, inversionista, tambe personanan creativo, pa join Innovation Week pa hunto hasi e siman aki mas grandi y pone Aruba riba plataforma internacional. Tin e posibilidad pa organisa workshops, reunion, of seminario riba creatividad, sostenibilidad y innovacion pa asina hunto nos contribui na e SDGs nan pa 2030. Pa mas informacion tocante 'Immerse Innovation Week', y oportunidadnan pa participa na e siman unico aki, bishita www.immersearuba.org