KPA: Lo traslada lote grandi di droga confisca, pa un lugar mas sigur

ORANJESTAD – Cuerpo policial di Aruba lo translada e lote grandi di droga confisca (2.200 kilo di cocaina) na un lugar mas sigur cu no por ser divulga pa seguridad den cuadro di investigacion. Asina e vocero suplente Liliana Rasmijn a informa diabierna den un comunicado. Tabata dialuna pasa den oranan di marduga kustwacht a intercepta un tugboat bou nomber di “GRACIA” den awanan teritorial di Aruba.Durante un investigacion ariba e tugboat aki a bin discubri un cargacion basta grandi di droga. Den un colaboracion estrecho entre Ministerio Publico y KPA. KPA a confisca a droganan pa mas investigacion. Pa motibonan di seguridad pa cu e magnitud grandi di droga cu a wordo confisca, Cuerpo Policial Aruba tin un procedura pa cu e maneho pa warda un lote asina grandi. Diferente factor ta hunga un rol den cuadro di un investigacion asina grandi. Pesey nos no por divulga na unda e lote grandi lo ser warda of ta warda pa seguridad di nos coleganan y tambe pa e investigacion. Mirando diferente rumornan cu ta bayendo rond na unda e droga ta warda. Lo translada esaki na un lugar mas sigur cu no por ser divulga pa seguridad den cuadro di investigacion. Mando policial ta conciente di e riesgo pa cu salud y cu bienestar di e polis cu ta den sercania di e droga. Trahando hunto cu e departamentonan den cuestion ariba nivel di seguridad nos lo percura pa e lote grandi aki no ta dañino pa salud pa ser humano y elo ta na un lugar adecua. Potret ta di archivo di noticiacla.com y cortesia di Warda Nos Costa.