Simar: Si gobierno no scucha pa indexering, lo subi caya!

ORANJESTAD – Sindicatonan cu ta bringando pa haya indexering paga, ta duna gobierno te diamars awor pa bin cu un proposicion di pago, sino nan (e sindicatonan) ta subi caya!. Asina presidente di sindicato SIMAR (di maestronan) Josephine Albertus a bisa noticiacla.com diabierna mainta despues di nan reunion. Si despues di diamars no tende nada of tin un proposicion cu no por biba cu ne, ta bay bek den seno sindical pa delinea e forma di accion cu lo tuma, pasobra e ora lo tin cu subi caya. Con y ki dia exacto, lo keda determina. Albertus mientrastanto ta contento cu e reaccion di awe mainta, unda cu segun nan conteo, tabatin 500 maestro. E ta representativo segun Albertus, pasobra e ta refleha tur sector di veld. Tin un total di riba 1300 maestro, pero for di scolnan tambe maestronan a vocifera nan sosten. 

E REUNION

E reunion mes a cuminsa pa 7’or awe mainta y a dura te 9’or manera anticipa, pa asina e maestronan por bay bek scol y duna les pa 9’or y mei. A avisa tur scol di e situacion y varios scol a manda carta un dia prome pa mayornan, informando cu scol ta cuminsa 9’or y mei pa motibo di e reunion aki. E reunion tabata uno informativo unda cu a informa e docentenan di e ultimo situacion. Gobierno ainda no kier duna aden segun Albertus, y nan (sindicatonan) no ta dispuesto pa warda mas.  

DERECHO

E hecho cu segun gobierno, indexering no ta un derecho sino un posibilidad, no ta corecto pasobra mientras cu enberdad e no ta un ley, tin un acuerdo firma cu gobierno (anterior) cu ta bisa cu si e situacion ta di tal forma cu mester ahusta costo di bida, tin cu paga indexering y mester a haci esaki for di 2018. Esey ta algo cu a palabra for di 2014 y ta un documento cu e gobierno aki mester honra.