Diabierna fraccion di MEP lo entrega ley di screening Ministers na Parlamento

ORANJESTAD - Diabierna fraccion di MEP lo entrega ley di screening Ministers na Presidente di Parlamento. Segun e lider di fraccion, Rocco Tjon, un investigacion di Banco Central algun tempo pasa, a accentua cu den comunidad ta biba e percepcion cu e grado di corupcion bou e politiconan ta halto. Ademas algun siman pasa nos tabata confronta atrobe cu e di dos caso, investigacion Avestruz, di corupcion di e gabinete anterior lidera pa Mike Eman. E siman aki e Parlamentarionan; Edgard Vrolijk LL.B y Rocco Tjon MBA ta haci entrega di e ley di screening Ministers y Minister Plenipotenciario (landsverordening integriteit ministers).

LANDSVERORDENING INTEGRITEIT MINISTERS

E ley aki ta regla screening di e candidatonan pa bira minister. E ta duna un base legal pa entre otro e investigacion di seguridad nacional y esun di Husticia por bay mas profundo. Pa ley lo bira posibel cu formador of Minister President por apunta un comision, cu por haci un investigacion, pa wak si un persona ta ministeriabel y si un minister por keda den funcion. Ademas di esaki e ta bira obligatorio pa ley cu un minister y su famia mester duna un relato financiero di tur nan propiedad. Un investigacion fiscal y un investigacion pa constata e transaccionnan iregular tambe ta forma parti di e screening.

CASTIGO

Den e ley a incorpora tambe e articulonan den cual ta determina e castigo pa un candidato Minister, Minister y su famia cu di un of otro manera ta viola e obligacion cu e ley aki ta pone riba nan. Castigonan ta varia te cu 4 aña di prison. Mester tuma bon nota cu castigo pa actonan coruptivo cu un mandatario comete ya caba ta regla den nos leynan di codigo penal.

MINISTERIABEL OF NO?

Pa garantisa integridad di gobernacion e ley aki ta nombra e motibonan (“uitsluitingsgronden”) pa cual no por nombra un persona minister. E personanan por ehempel cu a haya sentencia pa un crimen of ta sospechoso den un investigacion penal no por bira minister. E parlamentarionan Vrolijk y Tjon ta haya esaki sumamente importante pa garantisa integridad di gobernacion y na mes momento, pa restaura confiansa den e politiconan.

PA CONCLUI

E siman aki ta entrega e ley aki na tur Parlamentario. Den un reunion di comision central lo dicidi e ora cuanto tempo cada Parlamentario ta haya pa haci pregunta y despues lo fiha un fecha pa trata e ley. Den e simannan nos dilanti e Parlamentarionan Vrolijk y Tjon lo sigui duna splicacion riba e ley importante aki.