Gabinete Mike Eman II a sobrevivi mocion di desconfiansa

ORANJESTAD – E mocion di desconfiansa contra Gabinete Mike Eman II a keda rechasa cu 12 voto contra y 8 pro. E votacion a tuma lugar na final di tratamento di e reunion diabierna marduga.  Cu esaki, Parlamento a 'cumpli tambe cu e ultimatum poni pa comision ‘Ta Basta’ na presidente di parlamento Marisol Lopez Tromp, cu tabata pa trata e mocion aki durante un reunion publico. Inicialmente diahuebs anochi ainda e presidente di e comision, Miriam (Mimi) Rosel a recorda e presidente di Staten diahuebs den un carta (lesa e carta aki ) cu e lo no a duna oido na e peticion. Segun Rossel, e la spera cu e mandatario duna oido mas pronto cu ta posibel pa yama e reunion publico cu e la pidi den cual por trata e mocion entrega (lesa e mocion aki ) . Riba esaki, e presidente di parlamento a reacciona na NoticiaCla.com diahuebs anochi,  indicando cu e mocion, lo a wordo trata den e reunion di diahuebs mes. Pues no mester a yama un reunion ‘otro’ pa trata esaki. ‘E mester keda bij si dor di volg nos reunion publico” Lopez Tromp a bisa NoticiaCla.com a bisa. “Ya a atende e parti di nan verzoek pa un motie di (des)confianza caba den Staten. Tin dos motie riba e tema cu mas oro Statenleden lo vota riba dje den e Openbare Vergadering aki” Lopez a sigura NoticiaCla.com.

Tabata diaranson cu e comision a entrega e mocion via un manifiesto na presidente di Staten, den cual a duna e presidente 24 ora pa yama un reunion publico pa trata e mocion di desconfiansa contra gobierno di Aruba. E reunion, segun presidente di e comision ‘Ta Basta’ Mimi Rosel, no a tuma lugar ainda, aunke cu e presidente di Staten a mustra cu e reunion lo ta esun di presupuesto mes. Fotos cortesia ArubaAriba.