CAFt ta reanuda su bishita pa Aruba otro siman diahuebs

ORANJESTAD – Despues di cu 4 luna pasa nan a cancela nan bishita pa Aruba abruptamente, e colegio di supervision di aruba CAFt ta ‘reanuda’ nan bishita regular otro siman pa nos isla. For di e fuentenan fededigno, Noticiacla.com a compronde cu e hecho cu gobierno no a ratifica e cambio di e ley di LAFt, tabata suficiente pa nan (CAFt) reconsidera nan decision di juni ultimo, pa no bishita Aruba. E fecha pa nan proximo bishita pa Aruba lo ta otro siman diahuebs y diabierna, esta 24 y 25 di october respectivamente. 

E CANCELACION

Tabata dia 12 di juni ultimo cu CAFt a manda un carta pa Minister di Finanza, Xiomara Maduro e tempo ey, informando nan cu e colegio ta cancela nan bishita, como consecuencia cu un siman prome (6 di juni 2019), Parlamento a aproba un cambio di ley di LAFt, cu ta basicamente compromete e colegio su funcion y tarea fundamentalmente y como tal no tabata wak e como ‘oportuno’ pa bishita Aruba. Pero, manera ta conoci, oficialmente gobierno di Aruba a dicidi pa no ratifica e ley aproba ey, cu ta pone cu nada no ta cambia mas, y cu tur cos ta keda ‘status quo’, cu ta nifica tambe cu CAFt por sigui haci su trabou manera e tabata haci. Riba esaki sinembargo tin diferencia di opinion cu algun miembro di fraccion di MEP, manera Rocco Tjon, cu a bisa, cu nada no a cambia pa cu e trabou di CAFt. Ta solamente e aspecto di na ken tin cu duna cuenta a cambia, (e cambio lo a nifica cu CAFt ta raporta na Parlamento y gobierno di Aruba enbes di Rijksministerraad), pero e control por y lo sigui sin ningun problema. 

E BISHITA  AWOR

E bishita, for di loke e portal aki a compronde di su fuentenan ta, cu e ta uno normal. Pues e bishita rutinario na e gobernantenan y un conferencia di prensa na final. Pues, lo yega Aruba, reuni cu e gobernantenan y otro instancia necesario, y despues tene nan conferencia di prensa na final di nan bishita, unda cu lo duna un bista di tur loke a sosode durante e bishita. Notable tabata declaracion di parlamentario di MEP, Edgar Vrolijk, cu a pidi pueblo acudi na Parlamento dia 24 di october, ora cu CAFt ( segun Vrolijk) lo mester ta den Parlamento. Segun Vrolijk su declaracion na e matutino Bondia Aruba, CAFt mester responsabilisa su mes na pueblo awor, pakico a pidi un ‘aanwijzing’ pa Aruba.