Presupuesto adapta 2014 aproba den parlamento

ORANJESTAD – Presupuesto adapta 2014 a keda aproba den parlamento. Cu 12 voto pro y 8 contra, e ley aki a pasa despues di mei anochi,  (1:24 am) clausurando un periodo cu mester desemboca den terminacion di e KB riba cabes di Aruba. Hunto cu esey, a vota pa 6 mocion, di cual 4 tabata di partido AVP y 2 pa partido MEP. Tambe a vota pa e presupuesto di WIF cu a keda aproba unanimamente, mientras cu esun di DOW pa 2014 a keda aproba cu 12 voto pro y 8 contra.  Awor ta keda na e secretariaat di College Financieel Toezicht cu lo tin cu determina si a cumpli cu e palabracion di KB, pa despues pase pa gobernador firma, si e dicidi cu esaki ta ok.

Pa loke ta e reunion mes, uno maratonico manera por a spera, yena cu acusacion contra otro, y hopi momento di interumpcion cu ‘persoonlijk’ feit. E reunion publico pa trata e adaptacion di e presupuesto di gobierno pa 2014 a keda trata. For di comienso di e reunion diahuebs mainta, tabata notable cu esaki lo a bira un bay bin di palabra entre e dos partidonan mas grandi AVP y MEP. Hopi biaha e topiconan no tabata alcaso, pero a opta pa bay bek den historia y ataca otro a base personal hopi biaha. Cada minister tabata usa nan tempo di contesta pregunta, pa mas bien contesta e parlamentarionan opositorio usando topiconan di pasado conoci.

Hopi tabata e momentonan cu presidente di parlamento mester a cay aden pa para e discusionnan (cu cierto momento tabata bira hopi emocional). E unico cu a mantene su mes tur momento na e topico di e presupuesto, tabata minister di finanza Angel Bermudez. Riba su mes e tabata algo logico mirando cu e no ta un minister politico, y como tal no ta parti di e bay bin di ‘storia’ entre e politiconan den parlamento.

For di mainta cu e publico den sala, mester a controla e reunion di tal forma pa evita cu e publico por a domina e curso di e reunion. Despues di merdia e publico no a bolbe mas manera mainta. Esey no a kita afo cu e reunion a tuma un buelta pa peor, ora cu dado momento a bin un debate cayente entre parlamentarionan di AVP, Croes y Tromp, contra parlamentario Besaril, y unda a sali un parti di pasado di Besaril riba algo di pasado cu ta trata un caso di abuso sexual. Besaril a wordo pidi pa su fraccion pa trankilisa despues den nan fractie kamer.

A sigui contestacion riba e preguntanan relevante riba e presupuesto, y hopi tabata tambe riba e parti di CFT y e KB, cu a keda contesta pa minister di Finanzas Angel Bermudez. Di parti di ministernan Oduber y Sevinger, a bay riba historia di lider di partido MEP y su tata, un biaha mas, treciendo e asunto di friends and family y huurmento di edificio. Na final, e votamento a tuma lugar unda cu a trata entre otro e mocion di desconfiansa contra gabinete Mike Eman II, sigui pa e votacion pa e presupuesto adapta.

E mocion prome tabata di AVP pa continua cu e ehecucion di programa di gobierno. E la keda aproba 12-8   E mocion di MEP tabata  esun di desconfiansa contra gabinete Mike Eman II, e la keda desaproba cu 12 voto contra 8 pro.    Mocion 3 tabata di AVP pa usa e propio maneho di gobierno. 12-8 aproba  Mocion 4 tabata di AVP pa mantene e presupuesto manera cu e ta y pa e wordo firma 12-8 aproba . Mocion 5 tabata di AVP cu ta pidi pa sigui cu e geschillenregeling 12-8 aproba ... Mocion final, esta number 6 tabata di partido MEP pa institui un compensacion di prijs, acopla na e 'bestaans minimum' di e pueblo consumidor.E la keda desaproba cu 12 contra 8 pro.         Fotonan ta cortesia ArubaAriba.com