Aruba ta menasa di hiba Hulanda corte

DEN HAAG/ ORANJESTAD – Gobierno di Aruba ta menasa cu un caso huridico contra Hulanda (lesa gobierno di Reino) pasobra Hulanda lo ta trapando riba e derecho y interes di ciudadanonan di Aruba. Esaki e corant hulandes Algemeen Dagblad ta raportando diadomingo anochi. Segun gobierno di Aruba tin un esfuerso orchestra di Conseho di Minister di Reino, riba e presupuesto di nos isla. Esaki e gobierno di Aruba a laga sa na prensa hulandes (pa medio di un invitacion pa un conferencia di prensa). Notable ta cu den  e invitacion di prensa cu e gabinete a manda, e no a informa esaki localmente pero si den e invitacion pa prensa hulandes. Como tal, a traha un articulo cu e contenido di e invitacion, unda cu gobierno ta papia di 'no spaar nada pa logra nan meta contra Hulanda'.  E articulo aki a keda publica riba e red di Algemeen Dagblad di Hulanda.

‘Gobierno arubano lo no spaar ningun opcion politico, huridico y derecho humano pa para e intencion di Hulanda” Gobierno di Aruba ta laga sa. E conferencia di prensa di dialuna mainta ta haci strategicamente pa por alcansa prensa hulandes 2’or ora di Hulanda. Den e conferencia aki, nan lo anuncia e decision di hiba Hulanda corte.