Opinion: Persecusion politico?

Opinion: Persecusion politico?

Posted on 10/16/2019 3:34 pm AST | Updated on 10/16/2019 3:35 pm AST

Pa Armand Hessels

Den e prome siman di oktober 2019, tawatin entrada hudicial na cas di e ministro anterior di Infrastructura (2009-2017) y algun ‘colaborador’. Posiblemente e entradanan aki tawata consecuencia di e serie di denuncia di parti di fundashon ‘Nos ta Aruba’ na 2017. E denuncianan aki cu un descripshon detaya di e modus operandi a encera un petishon pa “investigashon penal di e ministro di Infrastructura, Desaroyo espacial y Integrashon di e tempo ey, encuanto  otorgamento di tereno di gobierno. Den esaki iregularidad serio y penal a tuma luga, entre cual negoshi y manipulashon cu tereno di gobierno, otorgamento di tereno contra pago ilegal, pago ilegal di funcionario di gobierno, corupshon, engaño intenshonal, falsificashon di documento, faborecimiento ilegal, fraude fiscal y labamento di placa”. E denuncianan tawata un representashon di e impreshon general den comunidad di Aruba cu tawata trata di negoshi na gran escala cu tereno di gobierno.  

E prome reacshon di e ex-ministro concerni y su ‘colaboradornan’ tawata cu aki ta trata di persecushon politico. Den su prome reacshon riba e asunto aki, lider di partido di AVP a comparti mesun opinion. El a mustra entre otro na absolushon di su ruman y prome ministro di e tempo ey cu, segun e, tambe tawata victima di persecushon politico. Asina e ta demostra di ta ignora (?) algun echo importante.

Desorden financiero intenshonal?

A entama e investigashon cu e tempo ey (Caso Fondo Desaroyo Nobo San Nicolas na comienso di e siglo aki) a conduci na persecushon Y (!) sentencia di ocho persona bou di preshon grandi di comunidad. Esaki tawatin e impreshon fuerte cu durante e gobernashon di AVP (1994-2001), corupshon na gran escala a tuma luga. Segun e analisis di documento di parti di “Comishon di Berdad’, e impreshon aki a resulta di ta corecto. Den e comishon aki, specialmente e director di Servicio Central di Accountant y Secretaria di Conseho Consultativo di e tempo ey a hunga un papel importante. Ya caba a base di apenas un solo proyecto a entrega denuncia contra ocho persona. Despues di investigashon penal, corte a haya tur ocho (incluso un ministro) culpabel. Prome ministro no tawata forma parti di e grupo ey. A base di testimonio di esnan ‘sentencia’, Ministerio Publico mes a hay’e culpabel di practica malicioso. Sinembargo, a absolv’e, entre otro pasobra “no tawatin cuenta anual cu por a uza pa verifica” y “cu no por compara presupuesto y cuenta anual drechi”. No por spera di corte cu “e mes lo calcula y compara tur cifra”. E administrashon financiero deficiente di gobierno, cu aña aden, aña afo sa haya critica di parti di Servicio Central di Accountant y Controlaria General, a resulta di ta un motibo perfecto pa abstene di persecushon. No ta por nada cu ningun di e dos partidonan a tuma iniciativa for di nan propio boluntad pa drecha e administrashon financiero efectivamente.

Un silencio hermetico

E caso di Ibis cu a conduci na investigashon y sentencia di un ministro di AVP pa motibo di practica coruptivo, a tuma luga bou di e ultimo gobernashon di AVP. E partido a mantene un silencio hermetico. Tambe ora cu Procurador General a declara den un entrevista cu for di e investigashon ey a sali asina hopi informashon, cu tin suficiente material pa 12 caso similar. Sinembargo, e falta di suficiente personal capacita tawata e obstaculo principal pa trata tur e casonan riba termino corto. Pero den comunidad di Aruba tawata reina e impreshon cu e gobierno di e tempo ey tawata eherce preshon fuerte riba Ministerio Publico pa no cuminsa otro investigashon penal pa un di dos (y di tres?) ministro di AVP.

Capacidad adishonal di investigashon

En realidad AVP ta abusa di e echo cu investigashon di posibel acto coruptivo di un di su ex-ministronan ta tuma hopi tempo y ta duna resultado apenas durante gobernashon di un otro gabinete. Pero e pregunta si aki ta trata di persecushon politico ta completamente irelevante. Si realmente AVP tuma e interes di pueblo na pecho, e lo mester enfoca riba e pregunta si di berdad ta trata di acto penal. Riba dje, e lo mester aspira, preferiblemente den coperashon cu e gobierno di coalishon, na expande e capacidad investigativo di Landsrecherche y RST. Finalmente e lo mester pone preshon riba ministro di Husticia pa cambia su resistencia pa Team Bestrijding Ondermijning (TBO) investiga corupshon na Aruba, den un coperashon completo. Si no, tur dos ta carga e sospecho legitimo cu nan tin hopi cos di sconde! 

  • Powered by SETAR