E trahadonan di Isla na Corsou a blokea caya caminda director di RDK ta biba

WILLEMSTAD - E trahadonan di Refineria Isla ayera nochi den careda di 10 or a basha bay entrada di Isla Post 7 y a blokia esaki. Niun hende por drenta of sali. Despues nan a bay na cas di director di Refineria di Corsou, Chonky de Lannoy, y a blokea e caya pa oranan largo, pendiente un prueba di e veredicto di corte cu ta indica cu e beslag ta solamente riba e fondonan di Aqualectra destina pa  pago na Refineria Isla.

Despues cu e trahadonan a haya un copia di e veredicto, pa aclareacion nan ta desea pa un abogado studia e veredicto.

Ayera anochi e reaccion di e trahadonan ta riba e beslag cu ayera Refineria di Corsou a pone riba Refineria isla y nan tabata kier pa lanta e beslag.

Refineria Isla mes ta lamenta e situacion aki y ta stroba nan di por traha, mirando cu hasta petroli nan a caba di haya.

E trahadonan ta rabia, pasobra e beslag ta pone nan salario di fin di e luna aki na peliger.

Lider sindical a papia na e sitio y a papia di sorpresa desagradabel pa e trahadonan. El a bisa cu no por permiti un cos y ta haci otro cos. A pone beslag riba tur tur cos riba e refineria.

E trahadonan ta exigi pa kita e beslag y bay sinta na mesa cu otro, pa yega na un solucion.

E beslag tin efecto riba nan salario segun e lider sindical.  E lider sindical ta preocupa, cu si un hende bira malo, con por atende si hende bira malo na nan policlinica.

E lider sindical no kier a bisa kico lo bay sosode y kico ta e accion. Pero nan ta papia si di reaccion cu ta bay haci dolor.

Na Post 7 tabatin lider di PWFC y tambe APRI, pa por dirigi e trahadonan, cu ta basta rabia.

Loke tambe ta masha interesante awor aki ta, cu tin e representantenan di e compania Klesch na Corsou.Cortesia Extra.