ORANJESTAD – Un ora despues cu aeropuerto Reina Beatrix a bati alarma di evacuacion awe mainta, e situacion a normalisa atrobe. Manera cu noticiacla.com a raporta inicialmente, a evacua tur persona den e terminal di yegada den careda di 9:30am debi na un problema cu e sistema di UPS (Uninterruptible Power Supply ) den e centro di comunicacion. Asina representante di aeropuerto Barbara Brown a comunica e momento ey. No tabata conoci exactamente kico e embergadura di e problema tabata exactamente. A busca cuerpo di bombero pa atende e situacion y evalua si ta kita e sistema UPS of no. Mientrastanto buelonan por a sigui opera, pero pasaheronan cu tabata yega Aruba, no por a baha di avion ainda. A resulta finalmente cu e situacion no tabata asina grave. Segun vocero di aeropuerto, e board di e computer a kima y no e baterianan, manera cu a kere inicialmente, cu por tabata mas grave. Mientrastanto tur empleado ta bayendo bek paden di e edificio.
ORANJESTAD - Diabierna 26 di april 2024 pa 7’or di mainta (ora local) a publica e edicion special di Staatscourant incluyendo un lista di e personanan na kende a otorga un Condecoracion Real e aña aki. Tradicionalmente e momento festivo aki, tambe conoci como Ocasion General, ta relaciona cu e cumpleaño di Su Mahestad, Rey Willem-Alexander, cu ta e Granmaestro di e condecoracionnan. Por otorga un condecoracion na personanan cu a duna un contribucion special na e sociedad.
ORANJESTAD - Horacio Oduber Hospital ta comparti cu comunidad di Aruba e cifranan pa loke ta luna di maart 2024. E cifranan aki banda di brinda transparencia y informacion ta duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, pero tambe cuanto donacion di sanger a tuma luga na Bloedbank y mas.
ORANJESTAD – Departamento di Impuesto ta su oficina principal na Camacuri lo ta cera pa publico diaranson, dia 24 di april 2024. Esaki ta debi na trabounan di mantencion necesario na e edifico. Mientrastanto Departamento di Impuesto kier sigura cu ta sigui brinda servicio na publico sin interupcion. Siguientemente ta sigui un skema di e servicionan.
ORANJESTAD – E organisacion independiente di conservacion di naturalesa conoci como Fundacion Parke Nacional Aruba (FPNA) ta usa e ocacion mundial di Dia di Mama Tera pa revela su transformacion pa Aruba Conservation Foundation (ACF). E transformacion akinan ta encera un nomber nobo, un logo, y identidad visual nobo cu ta alinea na e direccion strategico di e organisacion como un organisacion moderno di maneho di conservacion y alavez ta alinea na e necesidad actual pa conserva naturalesa di Aruba. Asina, e organisacion ta despedi di ta un organisacion tradicional di maneho di parke cu hopi a bin ta conoce pa mas cu 20 aña.