Hyatt Place Aruba Airport oficialmente inaugural awe mainta

ORANJESTAD - Awe mainta a tuma luga cortamento di cinta na Hyatt Place Aruba Airport, un proyecto hotelero di 50 miyon dollar. E apertura a keda efectua pa prome minister di Aruba Evelyn Wever. Esaki ta e prome espacio den Aruba Airport Hotel & Business Center, un centro di negoshi cu manera nan mes ta bisa, lo inclui banda di e hotel varios otro facilidad pa e huesped cu ta bishita Aruba pa trabou pero tambe e empresario local. E compania desaroyado di e proyecto, Pelca Development Comany, ta consisti di e gruponan inversionista Pellizzari y Cano.  

E COMIENSO

E proyecto a inicia den su fase di planificacion y desaroyo den tur disciplina den aña 2016 y na januari 2017 e acto protocolar a tuma luga caminda a eleva e prome columna di e edificio. Den un tempo   di 2 aña y mey e Pelca a completa e proyecto, y segun e compania, cumpliendo cu tur rekisitonan di siguridad,  tecnico y estetico. E compania ta admiti cu e no tabata un tarea facil. “Pero sin duda Pelca Development Company ta sumamente orguyoso di por a entrega e prome fase di e edificio pa asina haci e inauguracion di Hyatt Place Aruba Airport posibel” e compania ta finalisa bisando .

DETAYES

Hyatt Place Airport tin 116 camber, 43 empleado di cual 42 ta Arubiano, incluyendo e gerente general. Di e 116 camber, tin un variacion di camber standard y e cambernan completamente ekipa. Tin un piscina, ballroom y espacio pa haci reunion.