Wever: Reunion Serlimar cancela pa motibo di tempo y nada mas

ORANJESTAD – E cancelacion ‘abrupto’ diamars anochi di e reunion cu a trata e ley di Serlimar, tabatin su motibo. E forma sinembargo cu el a sosode, a crea suficiente caminda pa speculacion. ‘Ta suspende e reunion te proximo aviso’, tabata e unico loke cu e presidente di Parlamento Ady Thijsen a bisa diamars anochi. Esaki a laga hasta parlamentarionan cu preguntanan grandi. Pero mas informacion despues, a resulta cu tabatin motibonan pa e cancelacion. Prome minister Evelyn Wever a confirma esaki pa e portal aki. 

KICO A PASA

Segun Wever, e reunion tabata bayendo pa 10 ora caba, y tabata uno largo. Segun Wever, e mes a pidi e presidente pa pospone e reunion. Ademas  tabata obvio cu e oranan largo di reunion a afecta comportacion di esnan den publico cu tabatey ainda. Segun Wever, tabatin 20 orador programa pa papia, pero ora cu a suspende e reunion, tabata apenas 5 of 6 cu a haya chens pa papia. Como tal, e reunion lo no a termina toch diamars anochi. Como tal a pidi pa suspende e reunion y cumins’e pa un otro dia den oranan di mainta. 

CANCELACION DI REUNION CAFT

Loke a crea aun mas speculacion ta cu ora cu un rato despues a bin notificacion official cu e reunion di diaranson mainta 9’or pa trata e motibo di gobierno pa no ratifica e cambio di ley di LAFT, tambe a keda cancela ‘te proximo aviso’, sin ningun otro splicacion. Pero aki tambe tabatin motibo segun Wever. El a bisa e portal aki cu mayan mainta (diaranson) tin apertura di e hotel Hyatt na aeropuerto, pa cual e mester corta e cinta. Pues tabatin conflicto di schedule. Y pesey a pidi pa cambia e fecha aki. E fecha nobo no a wordo duna ainda. 

SPECULACION

Pa loke ta e speculacion, mesora a cuminsa pensa cu tabatin problema den gabinete Wever Croes, esta un crisis pasobra lo no tin suficiente voto pa coalicion logra pasa e ley. Rumornan cu si e ley no pasa, cu esey lo nifica caida di gobierno ya cu POR lo kita sosten di e gabinete como ‘protesta’. Tur esaki a haya mas bida. Pero segun Wever, esaki no ta berdad y ta puro speculacion sin base. No tin fecha pa e reunion di diaranson tuma lugar ni esun di diamars anochi.