Ultimatum pa Southwest Development ta vence e weekend aki

ORANJESTAD - Diabierna ta tende di desaroyadornan Southwest Development Corporation si nan ta ‘come across cu e parti financiero pa proyecto Hard Rock hotel, of si gobierno mester cobra e garantia di 2 miyon florin. Esaki e mandatario a confirma na e matutino Bon Dia Aruba diahuebs y ta splica esaki den su edicion di diabierna. E deadline extendi na fin di augustus, ta vence e fin di siman aki. E proyecto mester reemplaza loke antes tabata Bushiri Hotel.

E opcion ta cu si e proyecto no sigui, benta e edificio actual abou, y prepare pa convirtie den un beach publico, conforme promesa haci na Staten algun luna pasa, pa medio di un mocion. Informacion anterior (desmenti tambe den NoticiaCla.com pa minister encarga Otmar Oduber) a sugeri cu e grupo desaroyado, lo a laga e cadena Hard Rock cay, y bay cu e grupo di Hyatt cu ta encarga cu e parti di all inclusive. Esey pues a resulta di no ta berdad. NoticiaCla. com a compronde cu si dado caso mes Southwest dicidi riba nan mes pa busca un otro cadena, esaki lo habri caminda pa e # 2 cu a bay destaho, Sheraton, inicia un caso contra nan pa fayo. Esaki pasobra Sheraton lo keda cu e opcion pa haya e proyecto e ora.

E banco financiado Aruba Investment Bank, sorprendiendo tur hende na fin di augustus, a dicidi cu ta alarga e ultimatum y ta duna e grupo menciona, un tempo extra basa riba informacion cu nan lo a ricibi, cu ‘cos lo ta kedando cla’. Nan ta esnan cu por a haci esaki ya cu nan ta maneha e garantia di e suma di 2 miyon florin.