Minister Oduber no ta esun pa determina cu Ecogas mester cera pasobra el lo a fracasa

Minister Oduber no ta esun pa determina cu Ecogas mester cera pasobra el lo a fracasa

Posted on 10/15/2019 1:04 pm AST | Updated on 10/15/2019 1:29 pm AST

ORANJESTAD – Minister Otmar Oduber no ta esun cu por determina cu Ecological  (awor Ecogas) mester cera pasobra e lo a fracasa.  Asina e compania Ecogas ta bisa, alegando cu e mandatario ta ‘un gañado professional’ debi na tur e ponencianan cu el a bin ta haci ultimo tempo riba e tema aki. Ecogas y ,  contrario na ponencia di Otmar Oduber, Ecogas a duna bon resultado segun e compania y te ainda ta funciona hopi bon. A refresca memoria di e mandatario cu contrario na loke Oduber ta sigui bisa, Ecogas a wordo funda 13 aña pasa cu nomber di Ecological Technologies Freezone N. V. (Ecological) hopi prome cu a pensa pa produci gas.  E tempo ey e tipping fee na Parkietenbos lo a subí di F.60 pa F.160 pa ton pa cubri e costo real pero Gobierno e tempo ey a dicidi di subsidia e diferencia toch, lagando e tipping fee na Parkietenbos na 60 florin. Ningún cliente di Ecotech tabata dispuesto pa paga más  y e planta a start 9 aña pasa cobrando 60 florin y sacando recyclables manera cartón, papel, aluminum, hero etc. y sobrá tabata hiba Parkietenbos.  Ya caba e tempo ey Ecological a negocia cu Argos pa manda e sobrá di desperdicio (RDF) pa nan planta di cement pa wordo uza como fuel na luga di carbón. Económicamente esaki no tabata posibel cu un tipping fee di 60 florin y e projecto pa exporta a keda pendiente. No tabata tin ningun plan pa produci gas e tempo ey tampoco.

Mas of menos 6 aña pasa American Combustión di California a convense Ecological y WEB cu por convertí e sobra di desperdicio den RDF y traha gas pa genera electricidad. Ecological a cumpra e planta di American Combustión y WEB invertí den su propio instalación pa ricibi e gas di Ecological.

Lamentablemente, e technologia cu American Combustión a demonstra cu un pilot plant y cu tanto Ecological como WEB a kere aden te cu ambos empresa a hasi nan inversion, no a resulta den un tamaño industrial. Ecological (cu a cambia su nomber e tempo ey pa Ecogas) a sigui invertí den mehoracion y modificación di e planta te ora a logra pone tur cos funciona debidamente.  Pues, Otmar no ta esun cu por determina cu Ecological mester será pasobra e lo a fracasa, contrario na su ponencia, Ecogas a duna bon resultado y te ainda ta funciona hopi bon.  E contract entre Ecogas y WEB tabata stipula varios condición di calidad di e gas, den nan cu H2S no por ta mas cu 10 parts per million (10 PPM) pasobra e motor-generator lo no por a traha cu PPM mas halto. Como cu WEB a cumpra un motor-generator cu si por traha te cu 1,200 PPM Ecológicas (Ecogas) a pensa cu e gas cu a jega solamente 250 PPM lo no ta un problema pa WEB y pa tres luna a produci gas di bon calidad y cantidad te cu a pasa tur test cu excepción cu e H2S tabata más cu 10 PPM pero sin problema pa e motor. WEB a propone pa muda e motor pa tereno di Ecogas pa evita e problema di H2S pero después a hala atrás y a cancela e contract na 2018 aparentemente , pasobra na 2017 WEB a cuminsa traha riba e opcion di incinerator di Otmar. WEB no kier papia más cu Ecogas pa busca un solucion y aparentemente ta corte di justicia lo mester dicidi si WEB debe Ecogas of Ecogas debe WEB. No ta Otmar lo dicidi esaki.

E berdad segun Ecogas ta cu, ora cu Oduber a sinta como Minister na 2017 ela aserca Ecogas pa procesa tur desperdicio residencial (MSW) mescos cu Ecogas tabata bin ta hasi cu e MSW di Ecotech. A jega na un contract después cu su accountant a verifica e costo real pa procesa e MSW. Esaki a resulta den un tipping fee di 180 florin di cual 60 florin ta pa dera RDF den envirobales na Sero Teishi. Cu e tarifa aki a bira posibel pa manda e RDF pa Argos na Cartagena. Esaki lo ta un gran logro pa Aruba sin costo adicional, pero si ta asina mes cu den futuro no por exporta e RDF más, derando esaki den pit nan habri manera Butucu lo ta hopi mas económico y mehor pa medio ambiente cu kima tur sushi den un incinerator. Na e pit di Butucu so por dera 30 anja di RDF di henter Aruba.  Si Otmar kier pretende lo contrario,  lague bin cu un estudio di impacto ambiental y económico di un empresa multinacional y experto den e materia aki pa refuta loke Arcadis a concluí den su raport . Si Otmar kier stop e contract pa Ecogas procesa MSW di Serlimar esei si ta su pleno derecho pero Ecogas por sigui funciona cu e MSW di Ecotech cu ta representa 60 % di tur desperdicio residencial y comercial di Aruba. Pero, Otmar kier será Ecogas door di prohibi pa Ecotech di hiba su desperdicio (MSW) pa Ecogas. E kier será Ecotech tambe door di cobra tur cliente di Ecotech dobbel maske cu Serlimar no ta recoge nan desperdicio.  Obviamente cu ningún hende kier paga dobbel y  Ecotech lo mester será y atrobe Otmar y su voseronan lo kier grita cu ta pa mal manejo mientras cu tur esaki ta parti di su plan pa sera Ecogas y Ecotech for di 2017.   Pero su mal manejo di Serlimar cu ta core pa cuenta di pueblo no ta wordo debidamente questiona.

E compania madre MetaCorp ta sigura cu den 100 aña  semper a cumplí cu su obligación y a paga tur su debenan. Si juez dicidi cu mester paga WEB algo, MetaCorp lo cumplí y si juez dicidi cu WEB mester paga MetaCorp, sigur cu nan lo cumpli. “No ta Otmar ta dicidi. Mientrastanto Otmar no por acusa MetaCorp di nada” e compania ta finalisa bisando.

 

  • Zulo
  • Powered by SETAR