Oduber den Parlamento: Por reduci subsidio na Serlimar cu 12 miyon aki 5 aña

ORANJESTAD – E intencion ta pa 5 aña despues cu Parlamento pasa e ley di Serlimar, cu e compania ta suficientemente solido financieramente. Esey ta nifica e.o. cu gobierno por reduci e subsidio actual di 22 miyon, pa menos cu 10 miyon florin. Asina minister encarga cu Serlimar, Otmar Oduber a bisa e.o, diamars mainta ora cu e reunion aki a continua. E tabata posponi dos siman pasa pa motibo di vacacion di algun mandatario, entre nan e propio Otmar Oduber. 

CONTINUACION

Despues di un retraso di mei ora (e reunion tabata poni pa cuminsa 9’or awe mainta) Parlamento a inicia cu e continuacion di e reunion pa trata e ley di Serlimar. Tabata pues na turno minister   Oduber cu a cuminsa contesta pregunta, keto bay den e prome tanda. Mas of menos un ora y algo mas despues, a suspende e reunion ‘pa motibo tecnico’. “Awe nos ta den Parlamento pa atende e ley di Serlimar. Un ley cu lo fortifica Serlimar pa asina sera e dump di Parkietenbos definitivamente” ta loke cu prome minister Evelyn Wever a post riba facebook, riba e reunion.” Nos compromiso ta cu bienestar di e habitantenan di e vecindario di Parkietenbos y di medio ambiente y bienestar di comunidad en general”. Pa loke ta Parkietenbos, Oduber a mustra cu e ta na altura di e dos gruponan, di cual uno e tin bon combersacion y comunicacion cu ne, mientras cu e otro cu tin como vocero ‘un tal Henriquez’, a haya contesta tambe riba nan preocupacion, y esaki tabata primordialmente riba e asunto di incinerador, cu mientrastanto a wordo saca for di e ley. A admiti cu inicialmente esaki tabata parti di e ley, pero a opta (despues di pregunta y reclamo di cierto parlamentarionan) pa saca esaki afor mientrastanto. 

VOTAMENTO

E intencion tabata pa e ley aki keda trata pa despues tin votacion. E compania  priva Ecotech ta argumenta cu si e ley pasa, esaki por nifica fin di e compania su existencia, basa riba e ley, cu lo ‘no tin competencia husto’. Oduber a refuta e pensamento di e compania Ecotech, y ta lamenta e mal informacion cu e compania ta dunando. El a mustra cu e no ta kere cu e compania mester bay retira hende, pa e 10% di e clientenan priva cu nan tin. E hecho cu tin un contracto aworaki cu gobierno cu EcoGas pa 5.4 miyon florin, no ta motibo pa kita hende for di trabou. Segun Oduber, ta fondo cu anteriormente nan no tabatin. Pues si nan no tabatin e placa ey antes y no tabata kita hende for di trabou, awor cu nan ta haya 5.4 miyon, no por bay kita hende, e mandatario ta sigui bisa.