Kiwanis Club of Aruba a instala su directiva nobo cu presidente mas hoben di e club

ORANJESTAD - Recientemente durante un cena special, den e elegante Grand Ballroom di Aruba Marriott Resort & Stellaris Casino, e miembronan di Kiwanis Club of Aruba, a bini hunto pa instala e directiva nobo pa e aña Kiwanistico 2019 - 2020. Pa instala e directiva nobo, mester a tuma despedida prome di e directiva anterior. 

Edalitza Weller a elabora riba e aña cu e la fungi como presidente y tur e proyecto-, donacion- y e logronan cu a realisa pa e comunidad di Aruba. Tabata tin un presentacion di video cu tur e 19 proyectonan realisa durante e aña Kiwanistico 2018 – 2019. Un total di 4358 hora di servicio comunitario. Presidente, Edalitza Weller a gradici e directiva saliente y e club completo pa nan dedicacion, amor y e bon trabou cu nan a realisa. E instalacion di e directiva tabata uno hopi special, ya cu despues di 41 aña Aruba tin e honor di tin un “Governor” den nomber di sr. Robert Spellen. En conexion cu e celebracion special aki a duna honor na e “Past Lieutenant Governors” di e club sr. Gordhan Daryanani y sr. John Every a pin e directornan y vice presidentenan. “Governor“ Robert Spellen a pin e presidente, secretario y tesorero di Kiwanis Club of Aruba.  E directiva nobo tin como tarea pa guia nan club den e aña Kiwanistico 2019-2020.

E directornan pa Kiwanis Club of Aruba ta; Ryan Kock, Carol Kelly, Oslin Ismail, Sigrid Hammelburg, Yelitza Domacassé Helmeyer, Jokoeza Hooplot y Dorylee Pappers- Lopez Penha. Secretario: George Croes, tesorero: Claudine Ho Kang You, president saliente Norma Brinkenberg- Spellen, segundo vice-presidente: Nathalie Maduro, prome vice-presidente: Ingmar Ramharakh y como presidente pa di dos termino consecutivo Edalitza Weller. Mester remarca cu Edalitza ta e presidente femenino mas hoben y alabes e prome “SLP” femenino pa bira presidente di e club. “Service Leadership Program” ta e programanan partocina pa Kiwanis Club of Aruba na e scolnan caminda ta siña e hobennan for di tempran liderazgo, con pa traha den ekipo, organisa proyecto- y eventonan pa recauda fondo, y e importancia pa duna bek y contribui cu e comunidad. Edalitza Weller a forma parti di Kiwanis Key Club Colegio Arubano y durante su discurso el a elabora riba su experiencia como SLP y ki impacto esaki tabatin den su bida.