CAFT su menasa pa aanwijzing ta riba mesa ainda

ORANJESTAD – Fuera di un menasa di un aanwijzing, esta un instruccion for di RMR pasobra Parlamento a cambia e ley di LAFt sin aprobacion di Hulanda, tin tambe un conseho di e colegio di supervision financiero di Aruba (CAFT) pa un otro aanwijzing. Esaki pasobra Aruba no ta cumpliendo cu algun punto. Prome minister Evelyn Wever a confirma cu e carta di CAFT ta riba mesa y cu nan a contesta e carta. Si esaki enberdad ta transforma den un aanwijzing pa Aruba diabierna awor, 18 di October, e mandatario no por a bisa. 

PUNTO DI BISTA

Wever a bisa cu a contesta CAFt y a duna nan e punto di bista di gobierno riba papel. Segun Wever, e puntonan cu CAFt ta cuestiona, ta ‘honor a la verdad’. “Mi tambe ta preocupa cu nan. Un di nan ta e crisis plan cu personeels lasten y e otro ta e belastings plan”. Segun Wever, e bon ta cu CAFT ta bisa cu Aruba ta cumpliendo cu e normanan pa 2019 y cu e pronosticonan ta cu lo cumpli pa fin di 2019. E ta algo bon pasobra algun luna pasa, si bo a puntrami mi mes tabatin mi dudanan” Wever a confesa. 

PAKICO PONE FONDO SOCIAL CRISIS FONDS APART

A splica ‘un biaha mas’ cu a pone e fondo apart pasobra tin un problema social. Y si berdad kier atende cu e problema, mester duna e minister e fondo pa e traha, mientras cu e otro ministernan ta atende cu e resto di e problemanan di nos pais. Pero CAFT kier pa hink’e den presupuesto. Algo cu gobierno di Aruba no kier. Y esey ta e problema. E motibo segun Wever, cu e fondo ta ‘apart’ ta pasobra tur hende cu ta traha den e sociaal crisis plan y e fondonan, ta temporal. “Y nos conoce Aruba. Nos hinke den e presupuesto, e no ta bira temporal. Un hende cu bin traha pabo, y ta riba payroll di Aruba, bo no tin ningun obligacion di kite despues di dos aña” Wever a bisa. E ta un asunto ‘personeels technisch’, y e ta ‘begrotingstecnisch’.

E otro motibo pakico a pone apart, ta cu ora a negosha e protocol cu Hulanda na 2018, e suma di gasto personal di 479 miyon cu ta e plafond di gasto, no mag wordo surpasa. Si pone e 1. 4 miyon na salario pa e crisis plan den e presupuesto, e ta aumenta e plafond di 479 cu e 1.4, cu mesora ta ‘viola’ e protocol. Y esey lo ta un base pa un aanwijzing. “Dus e ora bo ta ‘damned if you do, damned if you don’t “, Wever a bisa. Y esey ta e otro motibo. 

NO TIN CONFIANSA

Segun Wever, ainda Hulanda no tin confiansa den Aruba. Segun e prome mandatario cu ta lidera e gabinete MEP, POR, RED, gobierno Hulandes tin un problema cu MEP. Pero e tin tambe cu e gobierno anterior, pasobra e gobierno anterior no a cumpli. Segun Wever, Hulanda no kier diferencia den gobierno di AVP of MEP, pasobra pa Hulanda, gobierno ta un continuacion.