Memo interno di CITGO a bruha tera pa e deal cu gobierno

ORANJESTAD – Citgo Refinery Aruba a bruha tera cu e comunicado interno cu nan a manda pa nan trahadonan e siman aki, informando nan trahadonan cu nan lo ‘suspende’ nan contracto pa restauracion y operacion di e refineria ‘temporalmente’ y cu e contracto lo ta bek den man di Citgo unabez un transicion democratico ta bek na Venezuela. Asina por a compronde di prome minister Evelyn Wever durante e programa Noticiacla LIVE diahuebs anochi. Segun e mandatario, e no ta para pa e contenido di e memo ey, Wever a sigura e portal aki. E forma con a formula e memo ey, ta trece confusion y problema solamente, e portal aki a compronde. E asunto ta otro manera cu Wever a sigura e portal aki y cu e contenido di e memo aki, e no ta refleha loke a sosode. 

KICO TA E REALIDAD

Segun Wever, loke a sosode ta cu durante negosashon cu Citgo pa por haya e yabi y control bek, Citgo a pidi gobierno pa si en caso gobierno no logra haya un partner nobo y cu e dealnan no sigui, pa Citgo ta e prome pa haya e yabi bek. Y esey si gobierno a bay di acuerdo cu ne segun Wever a splica den e programa. Nan mester a duna algo, pa asina Citgo por a concede e yabi y control bek. Nan (gobierno) no ta kere cu e situacion na Venezuela lo ta di tal forma cu lo Citgo haya e control bek, y tampoco cu gobierno no ta exitoso den logra haya un solucion otro cu ta Citgo. Pero, si dado caso resulta cu gobierno no ta exitoso, enberdad Citgo ta e prome yama pa haya e control bek. Por considere como un tipo di awa den biña, pa por a logra loke cu gobierno kier a logra y esaki parse, tabata e forma pa logra haya Citgo pa duna gobierno e control. 

E MEMO

E memo sinembargo, publica diahuebs mes, tabata papia otro idioma, cu a pone hopi hende sea rabia of confundi mas ainda. E memo tabata na ingles y traduci, tabata bisa cu “ Citgo a yega na un acuerdo cu gobierno pa temporalmente suspende nan (Citgo) contract pa opera e refineria.  Esaki ta nifica cu e operacion di e terminal lo ta temporalmente transferi pa gobierno di Aruba. Citgo Aruba lo  atende su obligacionnan cu e trahadonan y e vendornan durante e transferencia di operacion y cu e contracto lo ta bek unabez cu un transicion democratico (di poder) ta bek na Venezuela”. E contenido y formulacion, no ta conta cu aprobacion di prome minister Wever, y el a bisa cu esaki no ta loke nan a palabra. Pero  por compronde e forma di skibi e memo. Riba pregunta cu si esaki lo a wordo haci pa Citgo no ‘perde cara’, e mandatario a bisa cu esaki posiblemente por ta un motibo. 

DEAL

Manera ta conoci, gobierno e siman aki a anuncia cu a yega na un deal cu e refineria pa entrega control bek na gobierno,  cu ta e comienso di e proceso pa haya un operador nobo. Esaki ta e fase uno. Esey ta nifica cu firmamento proximamente di un MoU, lo duna gobierno e poder pa cuminsa negosha activamente cu otro companianan pa tuma e refineria over. Despues ta sigui e otro fase unda cu lo tin cu suspende e operacion y finalmente termina e contracto cu e refineria. E refineria su contracto originalmente tabata pa October 2020, e refineria ta operando completamente manera cu a palabra cu e gabinete anterior, den un forma di un upgrader.