Manera anticipa, miembronan di sindicato di polis a bay den accion

BARCADERA – Manera anticipa, sindicato di polis a organisa un accion di dos ora pa su miembronan diabierna atardi 1’or pa mustra nan malcontento cu gobierno pa e asunto di pago di indexering. For di april nan ta tratando na haya un palabracion cu gobierno, pero segun e presidente di e sindicato Dirksz, gobierno ta blo pidi pa mas tempo, pero no ta bin cu nada concreto. Como tal miembronan a dicidi cu ta basta y a dicidi cu ta cuminsa cu e prome accion di 2 ora. Depende e reaccion cu nan haya, nan por extende esaki. E accion sinembargo no a pone polis plat, pero a causa un asina yama ‘minimale bezetting’. Despues di e accion, polisnan a reanuda nan trabou. Polisnan mes momento no tabata kier presencia di minister di husticia, Andin Bikker contrario na su peticion pa ta presente. Esaki pasobra segun e polisnan, tur e tempo nan no a tende nada di e mandatario y awor cu ta bay accion, e mandatario kier core bin e reunion.