AHATA cu carta pa gobierno ‘follow up’ pa bin cu ley pa UTV’s y ATVs’

ORANJESTAD – Mientras cu gobierno di Aruba a anuncia na juni di e aña aki, cu ta trahando riba cambio di ley y of maneho pa e vehiculonan recreacional manera UTV of ATVs (quadracers), Aruba Hotel & Tourism Association (AHATA) e siman aki a pidi gobierno pa bay mas leu cu esey. Den un carta dirigi na e mandatario (cual carta noticiacla.com tin den su poder), AHATA su CEO Tisa LaSorte a pidi gobierno un update riba e pasonan cu nan ta tumando, pero kier mas. “Ta importante pa e reglanan no keda introduci solamente pa un ley, sino tambe ta acompaña pa un plan solido pa enforsa esaki y un definicion cla di cua agencia ta autorisa y responsabel pa reenforza esaki” AHATA ta bisa den e carta. 

CARTA INICIAL

AHATA a recorda gobierno den nan carta cu ta for di januari di e aña aki caba nan (AHATA) a manda un carta pa  gobierno cu nan (AHATA) preocupacion riba e tema. E accidentenan cu e tipo di vehiculonan aki mientrastanto a cuminsa aumenta. Recientemente ainda tabatin un accidente cu un deportista internacional na Aruba (el a bin Aruba pa competencia di Crossfit di Fitville) cu a keda paralisa a consecuencia di e accidente aki. Bek pa loke ta e carta di AHATA, na ta haya cu ta esencial pa tin multa pa falta di cumplimento, y eventual revocacion di permiso di e compania cu ta opera e tipo di vehiculonan aki. 

GOBIERNO SU ACTUACION

Manera ya raporta, taabta na juni ultimo cu gobierno a informa publicamente cu tanto ministernan Oduber (infrastructura) y Romero (transporte) a informa riba e tema aki. Nan motibo pa e atencion tabata netamente e cantidad di accidente cu a subi ‘drasticamente’. Fuera di e accidentenan, tabata toca e ‘daño na nos naturalesa’. E tempo ey, a bisa cu “ ta sondeando tur posibilidad pa por bin cu cierto cambionan y regulacionnan den ley cu lo sirbi como herment pa tanto e autoridadnan competente y e companianan cu ta brinda e servicion aki, evita mas posibel pa destruccionan na nos naturalesa di e indole aki sigui tuma lugar”. Esaki pasbra “Nos ta biba den un pais cu ta depende di turismo como prome pilar economico”. 

PERHUDICA OPERACION

Di otro banda, gobierno a bisa tambe cu e intencion no ta pa perhudica operacion di vehiculonan aki, y cu ta reconoce cu nan ta parti di e industria turistico, di e experiencia y tambe parti di e producto cu ta ofrece. Pero consciente  si cu mester percura semper cu esaki por tuma luga respetando nos naturalesa, seguridad den trafico, respetando salud y calidad di bida habitantenan, cualnan ta forma parti di e maneho di Gobierno pa percura pa ser humano ta central.

AHATA CU REGLA 

Segun AHATA den nan ultimo carta, nan a consulta cu nan miembronan cu ta opera e toursnan di UTV, y a compila un cantidad di regla propone pa bira ley. “Cu e carta aki nos ta pidi un actualisacion di e esfuerso di gobierno pa introduci legislacion, manera recomenda” e carta ta sigui bisa. E intencion di AHATA ta pa tin regla y ley cu ta bay mas leu cu djis vigila e autonan y nan comportacion, pero tambe e parti di flora y fauna cu por keda destrui debi na e operacion di e vehiculonan aki. Mas aleu, e portal aki a compronde cu nan lo kier mira si por regula e areanan specifico unda cu e vehiculonan aki por trafica, envez di awor, unda cu nan ta coriendo tur caminda rond di Aruba. 

 .