Corte a prohibi Gobierno pa desmantela parti di kiosk na Eagle Beach

ORANJESTAD – Corte a prohibi Dienst Openbare Werken (DOW) y Directie Infrastructuur en Planning (DIP) pa desmantela parti di un kiosko na Eagle Beach, te ora cu tin un decision riba e keho (bezwaar) di e doño, esta Roque Wernet. Asina huez a dicta diaranson ultimo den un sentencia cu Noticiacla.com tin den su poder. E doño na augustus ultimo a haya orden pa desmantela parti extra di un kiosko, pasobra nan ta construi ilegalmente pues sin permiso di e dos instancianan menciona. E doño a bringa esaki y a bay para dilanti mesa berde. Cu e sentencia aki, DOW y DIP tin cu warda te ora corte trata e obhecion di e doño, prome cu por tuma e siguiente paso. 

E CASO

E caso ta data di 2018, ora cu e doño di e kiosk a pidi pa por pone un dak riba su kiosk pa cubri e terasa. Na 2019, el a haci otro peticion, pero e biaha aki pa pone rolluiken. Sinembargo riba ambos peticion, e no a haya contesta. Algun tempo despues e mes a dicidi di amplia su lugar cu ambos cos, esta un dak y rolluiken, cu tabata un inversion di 50 mil florin total. Na augustus, ora cu DOW y DIP a bin, a bisa cu e ta haya 14 dia pa desmantela e loke el a pone extra, sino nan lo hacie pe. E no a acepta esey y a cuminsa e proceso legal.

CORTE

Huez ta di opinion cu gobierno mester duna e huurdo sikiera tempo pa e por bringa su caso y wak kico ta sali di e caso aki, prome cu bin y den un forma unilateral, desmantela e loke cu nan no kier pa e tin mas debi cu e ta ‘ilegal’. E no a husga si loke a keda poni extra, ta ilegal of no, sino solamente cu e doño mester por bringa su caso prome cu autoridad pasa pa desmantelacion. No ta conoci cuanto tempo e tempo di  obhecion lo tuma, pero normalmente esaki ta 6 siman. Lesa e sentencia AKI.