DIMP: Casi 7 mil number di vehiculo no tin nada paga ainda pa 2019

ORANJESTAD – Casi 7 mil vehiculo na Aruba no tin nan number paga ainda (nummerplaat) pa 2019. Asina e vocero di departamento di impuesto Meverly Romano a bisa noticiacla.com diahuebs mainta. Segun Romano, e cifra exacto ta 6886 vehiculo, di cual 6077 ta number plaat categoria A. Considerando cu nos ta na october y cu for di juli, e fecha final di pago a vence, Romano (DIMP) ta considera esaki preocupante. Nan ta forma e 13% cu ta den ‘incumplimento’. Di otro banda, 84% di e vehiculonan ta den cumplimento, cu ta di aprecia. 

PAGO

Na Aruba tin 87.531 number di vehiculo registra na oficina di impuesto. For di esaki, 84% a cumpli, esta cu a paga manera debe ser, 13% (11.097) no ta cumpliendo y 3% a entrega number di vehiculo bek na DIMP. For di e 11.097, tin 4211 number cu ta paga mitar aña, mientras cu 6886 no tin nada nada paga ainda pa 2019. E categoria cu ta mas ‘popular’, cu ta categoria ‘A’, tin 3.682 cu tin mitar aña paga, mientras cu 6.077 no a paga nada ainda. Pues tin 9.759 den categoria ‘A’, cu ta den incumplimento di nan pago. Nan lo haya nan ‘naheffings aanslag’ sigur y tanten no a paga nada pa 2019, no por paga of haya number di 2020.