Grupo di recherché a bolbe tene walk out awe mainta

SANTA CRUZ – Pa di dos biaha den un corto tempo, e departamento di recherche di Playa a tene un ‘walk out’ debi cu e situacion di trabou no a keda remedia. Algun tempo pasa caba, ora cu e protesta, gobierno a priminti un solucion temporal, pero te cu awor esaki no a materialisa. Como tal a opta pa bay den accion pa 2 ora, pa wak si gobierno e biaha aki ta tuma nan mas na serio. Si no haya reaccion, lo escala esaki. E accion di diabierna proximo, ta un otro tipo di accion, pero e recherchenan lo forma parti tambe di e accion ey. 

SITUACION

For di biaha pasa, e polisnan (recherche) a ‘walk out’ caba, pasobra e situacion no tabata duna mas pa traha. Algun luna atras a saca tur for di e departamento general na Frankrijkstraat, unda cu tabatin e.o. problema cu ‘schimmel’. A reparti tur recherche den diferente warda, pero algun recherche no a keda bon reparti, entre nan esunnan di Oranjestad. Ora cu a tene e ultimo accion, Minister di Husticia, Andin Bikker, mesora a acudi na e sitio (warda na Macuarima), unda cu a priminti cu lo ubica e grupo den e edificio di Doc Opleiding na Playa, y cu e edificio na Wayaca (ex Brown Building) tambe lo keda cla pa tur polis bay eyden. 

TARDANSA

Sinembargo segun e sindicato di polis SPA, nada no a sosode. Y mientrastanto ta mitar di october caba, december ta stop construccion, temporada di Carnaval ta cuminsa y tur trabou ta aumenta. Aworaki caba, recherche no por duna e servicio necesario manera mester ta, mientras cu crimen si ta sigui aumenta, y ta hayando hopi presion di Ministerio Publico pa trata e casonan cu ta andando. Mirando tur esaki, a dicidi di ranca e bel un biaha mas, pa asina wak si awor si gobierno ta duna nan e atencion cu a keda priminti.