SAC ta topa gobierno den Corte otro siman

ORANJESTAD – E caso cu Stichting Arubaanse Carnaval a entama contra gobierno di Aruba, ta tuma lugar dialuna awor. E fecha cu Corte a reserva ta dialuna 2 di december pa 2or di atardi pa tende tur dos partido den e caso LAR pa obliga gobierno stipula e fecha pa duna e permisonan (18) pa carnaval 2015. Diamars ultimo, Stichting Arubaanse Carnaval su abogado Darrin Crouch a entama e proximo caso contra gobierno di Aruba, den e caso aki prome minister Mike Eman (Min AZ) . E la confirma esaki na NoticiaCla.com, informando cu e la ‘dien in’ e asina yama bezwaarschriften serca prome minister Mike Eman, y un peticion pa 19 ‘voorlopige voorzieningen’ osea un ‘interdicto perliminar’ na Corte di Husticia. E peticion pues ta pa pidi gobierno pa otorga SAC 18 permiso ‘temporal’ pa por organisa actividadnan carnavalesco. “Awor mester warda e fecha” Crouch a sigui bisa. Y pa fecha Noticiacla.com a compronde cu esaki por tabata pa otro siman dialuna caba, esta 2 di december proximo. Y ta resulta cu esey mes a bira e fecha. 

Dialuna ultimo e 12 siman for di momento di entrega di e peticion di permiso pa carnaval a pasa, y pa ley, despues di esey por protesta. Ley di Lar no ta permiti un abogado protesta y keha riba un peticion di un permiso prome cu esey. Y como tal e abogado su ‘man tabata mara’. Awor esey ta cambia y por entama un caso. E diferencia cu por a entrega e caso siman pasa, ta pasobra a haci a base di informacion cu gobierno lo a duna e otro partido, esta SMAC, e permiso di carnaval caba. Y mirando cu e peticion di e caso, tabata netamente pa prohibi gobierno pa duna SMAC e permiso, esey no tabata al caso mas ‘pasobra ningun permiso a wordo duna’.

Tabata un siman pasa cu gobierno a manda un nota pa corte y abogado consecuentemente, aclareando cu ningun momento a duna SMAC un permiso di carnaval. Como tal e caso no tin sentido pa tuma lugar. Y consecuentemente SAC a ‘hou aan’ e caso ey, y a warda pa diamars (awe) pa entama e caso nobo, den cual e ta forza gobierno bin cu un fecha pa anuncia ken ta haya e permiso. E urgencia ta cu tanten cu no tin permiso duna, e pueblo carnavalesco ta keda cu duda kico ta pasa y cu esey nan participacion na carnaval. Y de hecho, no ta e gruponan sino e participante ta haci carnaval, segun SAC a bringa tur tempo. Notable ta cu den e caso aki, no a dagvaard minister di Cultura e biaha aki, esta Otmar Oduber, sino solamente minister di Algemene Zaken, Mike Eman.