Debate 'cayente' den Tweede Kamer ora cu a trata Aruba, Corsou y St Maarten

DEN HAAG – Biña bieu den saco nobo, ta con mayoria di parlamentarionan Hulandes a considera e argumentonan di colega parlamentario di VVD Andre Bosman e siman aki durante un debate riba Caribe Hulandes y e presupuesto di Relacionan di Reino. Tabata durante e reunion aki den Tweede Kamer, cu parlamentarionan Hulandes a subi lomba di otro riba e tema di Caribe Hulandes, particularmente e relacion entre Hulanda y e islanan akibanda. E partido den coalicion VVD ta fada cu Aruba segun su representante Andre Bosman. Pero coleganan Parlamentario no ta riba e mesun liña cu ne. Bosman kier cambia statuut, mientras cu coleganan ta haya cu Hulanda no por y no mester bandona e islanan.  

DEBATE

E tema a causa pa un momento di debate cayente entre miembronan di VVD (Bosman) y CDA(Chris van Dam). Dado momento ora cu Bosman a compara e situacion cu alcoholismo, van Dam a cana bay. Bosman kier men cu, ‘e situacion actual ta mescos cu si e islanan ta alcoholic, y Hulanda duna nan un cerbes pa bay ‘calma nan’. Segun Bosman, no tin sentido pa haci palabracion mas, pasobra gobernantenan di Caribe Hulandes no ta tene nan mes na palabracion toch. Y ora cu cos pega si, nan ta bira wak Hulanda. 

BIÑA

E partidonan manera CDA (di coalicion) y oposicion (Groenlinks), VVD ta laga e islanan pa nan cuenta, siendo cu tin desaroyo positivo politico, entre e generacion nobo. Aki ta unda cu a referi na e comentarionan repetitivo di Bosman, como ‘biña bieu den saco nobo’. E tema di biña a bin ora cu Bosman a reta algun parlamentario un of dos biña caro, ora di trata e tema di e islanan aki y nan situacion. Mas concreto, el a bet dos biña caro y un cena, pa e hecho cu e islanan di Reino Hulandes lo no presenta ora cu trata e futuro di nan y nan posicion den e statuut actual. Bosman kier cambia esaki pero cu e islanan no ta reaccionando riba e tema. Esaki ora cu e secretario di estado Hulandes Raymond Knops a priminti di lo bay papia cu e islanan riba  tema. Potret ta screenshot di debate den Tweede Kamer.