Polisnan lo protesta diabierna merdia pa indexering

ORANJESTAD – Diabierna atardi 1’or polisnan cu ta miembro di sindicato SPA, lo drenta den un accion di dos ora, pa protesta riba asunto di indexering. Asina Maiky Solognier di SPA a confirma pa Noticiacla.com diaranson atardi. E accion ta programa pa cuminsa 1’or y caba 3’or. Si ta necesario, lo intensifica esaki. Mientras cu detayes no ta completo, e portal aki a compronde cu e siman aki tabatin reunion cu gobierno riba e tema y cu e resultado no tabata positivo. Fuera di polis, no ta descarta cu douane tambe lo drenta den accion, aunke e ultimo aki no por a keda confirma ainda. 

CANTIDAD

Pa hinca e situacion den perspectiva, tin mas of menos 300 polis miembro di SPA, di cual 150 ta polisnan uniforma. Si ta bon, tur polis lo ta den accion diabierna, cu ta haci e situacion uno interesante unda cu e hefenan lo tin cu bay asumi nan responsabilidad policial y cubri loke mester cubri. Keda pendiente pa mas informacion riba e tema.