Area di rotonde na Noord tabata bou di awa un dia despues cu a habrie

ORANJESTAD – Un dia despues cu a habri e rotonde na Noord, e caminda pa cu e rotonde tabata bou di awa diaranson merdia, despues di un yobida chikito. Mesora e potretnan a cuminsa circula tocante e situacion, di cual e automobilistanan no por a kere loke nan ta mira. Ta conoci cu varios rotonde na Aruba a haya nan mes den un situacion similar, ora cu a caba di habri esaki. Esun mas pio tabata na e rotonde di Cumana, unda cu mester a trece hende for di Hulanda pa remedia e situacion. Otro caminda tambe rotonde a bay bou awa durante yobida den pasado recien. E infrastructura parce di no ta wanta e yobida duro di un rato, cu e consecuencia menciona. No ta conoci si ta bay remedia e situacion, of si ta cuestion di warda un rato cu e awa a para y despues e lo ‘disparce’ atrobe. Potretnan cortesia Ulisses Maduro/Facebook.