MoU entre gobierno y CITGO lo yuda kita presion di Hulanda

ORANJESTAD – E noticia di firmamento di Memorandum of Understanding entre gobierno di Aruba y CITGO por yuda ‘kita presion di Hulanda (lesa: CAFt)  contra gobierno di Aruba’. Mientras cu esey no tabata palabranan di prome minister Evelyn Wever diaranson mainta durante su conferencia di prensa extraordinario, por a compronde si cu esey ta e situacion. Loke cu si Wever a bisa, ta cu e fondonan cu operacion di e terminal na CITGO lo genera, lo por cubri e ‘buraco financiero’ y percura pa otro aña gobierno cumpli cu normanan manera stipula den protocol cu Hulanda. 

MENASA DI AANWIJZING

Mas concreto, segun Wever, cu un entrada structura asina, e ta duna CAFt e siguransa mas ainda cu Aruba lo cumpli otro aña cu e norma, y pa asina CAFt no tin cu menasa mas cu aanwijzing manera e la bin ta haci pa un tempo caba. “Na e momentonan aki nos tin e presion di Hulanda, di CFT, cu ta keda insisti cu nos mester bin cu mas medida y hasta, ta menasa cu aanwijzing” Wever a bisa. No obstante cu Hulanda ta admiti cu cosnan ta bayendo miho pa Aruba, toch nan ta keda menasa pasobra ‘talvez’ otro aña nos lo no por cumpli cu e normanan’, Wever a bisa. Segun Wever, Aruba ta diferencia di opinion cu CAFt y Hulanda, y a scohe pa busca alternativa pa cera e gap financiero. E mandatario ta sinembargo compronde e presion cu Hulanda y CFT ta pone riba Aruba, y ta referi na e debe halto di Aruba. Y ta aki e asunto di MoU ta bin na un momento perfecto cu ta yuda alivia e situacion financiero pa cu e placa cu lo por cuminsa drenta unabez cu esaki ta oficialmente den man di gobierno di Aruba.  

E MOU

Manera cu noticiacla.com a raporta awe mainta, Gobierno di Aruba a anuncia awe mainta tempran cu nan ta na e punto pa firma un Memorandum Of Understanding (MOU) cu CITGO. Esaki ta pa gobierno haya e yabi bek di e refineria y e terminal y waf y tur otro propiedad cu CITGO ta lease for di Refineria di Aruba (RdA),  y siguientemente cuminsa negosha cu e otro interesadonan pa opera e refineria. Prome Minister, Evelyn Wever Croes a confirma asina, cu CITGO lo no sigui cu e operacion mas. Mientras cu a anuncia cu ta firma e MOU, no tin fecha exacto ainda, di ki dia CITGO lo tin su ultimo dia na Aruba.