• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Gobierno ta firma MoU cu CITGO pa haya control bek di refineria

ORANJESTAD – Gobierno di Aruba a anuncia diaranson mainta tempran cu nan ta na e punto pa firma un Memorandum Of Understanding (MOU) cu CITGO. Esaki ta pa gobierno haya e yabi bek di e refineria y e terminal y waf y tur otro propiedad cu CITGO ta lease for di Refineria di Aruba (RdA),  y siguientemente cuminsa negosha cu e otro interesadonan pa opera e refineria. Prome Minister, Evelyn Wever Croes a confirma asina, cu CITGO lo no sigui cu e operacion mas. Mientras cu a anuncia cu ta firma e MOU, no tin fecha exacto ainda, di ki dia CITGO lo tin su ultimo dia na Aruba ni ki dia lo firma e MoU. 

INICIO DI COMBERSACION

Segun Wever Croes, tur cos a cuminsa durante e biahe pa Washington mas tempran e aña aki, unda cu a reuni cu OFAC y segun Wever el a bisa hopi cla cu CITGO no lo por bay cumpli cu e contract cu Aruba. Pero e contracto no tabata duna espacio pa haci algo prome cu 2020. Ora cu a bolbe di Washington, a pone presion riba CITGO y lobby pa libera Aruba di e contracto. Tur esaki a tuma hopi tempo. Despues CITGO, segun Wever Croes, a admiti cu nan no ta den posicion pa por cumpli cu e acuerdo. 

MOU

Esey tabata e prome fase pa determina e MOU, unda cu ta determina e puntonan principal, cu ta bay guia e traspaso final di e propiedadnan di CITGO y haya esaki bek y suspende e acuerdo cu CITGO. Cu e MOU aki, Aruba ta haya e yabi di e terminal y e refineria bek segun Wever. Esaki ta permiti Aruba cuminsa busca y negosha na serio cu otro persona, cu ta interesa pa opera e terminal cu e waf y e refineria. E punto cardinal di e MOU ta, cu CITGO mester cumpli cu tur obligacion cu e tin pa cu su trahadornan y e contratistanan. Esey tabata un punto importante segun Wever Croes, cu gobierno a exigi, pasobra inicialmente CITGO lo a bisa cu nan no tin e placa pa paga trahado. “Anto e ora nos a bisa cu nos no ta negosha cu boso. E ora nos a yega na e punto, cu e ora nan ta garantisa e derecho di e trahadonan di e compania” Wever Croes a bisa. Despues a mustra cu ta keda pendiente e debenan habri cu e.o. gobierno y RdA. Eseynan tin cu bay wak ainda, con ta logra paga esaki. Pero importante ta cu pa awor, e pagonan atrasa na e trahadornan, vendors y contratista, ta garantisa. 

PROXIMO FASE

Ya caba tin un lista di riba 25 compania cu lo a expresa interes pa sea opera of tin di haber cu e facilidad. Wever Croes no a menciona e nombernan, pero a indica cu tin varios forma di interes for di financia e operacion, te na cumpra parti di dje, haci esaki full un refineria enbes di solamente un upgrader, y mas posibilidad. Wever Croes a yama e interesnan ‘hopi hopi interesante’. Segun Wever Croes, gobierno awor por bay negosha cu e companianan aki y unabes cu tin un deal, lo tin cu bay bek CITGO pa negosha e ‘suspension di contract’, pa finalmente negosha e ‘terminacion di contract’. E MoU awor ta solamente permiti gobierno negosha activamente cu un otro partner. A bisa tambe cu no ta bay limita na e 25 companianan sino, cu lo bay busca mas interesado. Ya caba na Washington a pidi pa haci un ‘roadshow’ na Houston, cu lo ta interesa. “Nos interes ta, pa haya e mihor partner pa Aruba y esey ta loke nos ta bay busca”. Ta buscando no solamente un partner pa upgrader, sino tambe pa hacie un ‘state of the art refinery of industry’, pa e por cumpli cu e standard di medio ambiental, ta paga su ‘fair share’ y ta paga su trahadonan bon y ta un bon partner pa Aruba.

TERMINAL

Cu e firmamento di un MoU, gobierno ta bay haya e control di e waf, y e terminal cu tambe mester di e mantencion cu no a tuma lugar segun Wever Croes. A repasa bon tempo di Wickland Oil, cu tabatin hopi ganashi. Algo cu segun Wever Croes, CITGO no a haci cu ta pone cu mester mantencion awor. No obstante, e tankinan tin un balor hopi halto ainda, y lo percura pa e genera entrada halto atrobe. 

FMSA 

FMSA, cu ta esun encarga cu e fuel supply na Aruba, ta bay mantene e tankinan y e instalacionnan nan mes, pues no ta depende mas di CITGO y ta bay haya control di e instalacion, cu por suministra fuel y cu lo no tin interupcion e ora. Y FMSA lo no tin cu bay paga e suma mas (un tipo di fee) mas, pues e gastonan di FMSA ta baha, cu ta pone cu nan lo por eventualmente absorba mas gasto di gasoline, cu por traduci den gasoline mas barata.