A inicia fase 2 di mehoracion y embeyecimento rond misa di Playa

ORANJESTAD – Despues cu DOW a completa e prome fase di embeyecimento rond di e misa na Playa, awor ta inicia e fase 2. E   fase 2 di renobacion di Misa Oranjestad ta encera mehoracion di e infrastructura di e parkinglot dilanti di e misa pa crea mas eficiencia den e trafico y mihor sitio pa e autobusnan staciona. Ademas lo percura pa crea un parada di bus cu dak y espacio pa sinta pa personanan por warda pa bus den un ambiente mas comodo y agradabel. Tur esaki den cuadro di eleva e calidad di bida di nos hendenan.

100 AÑA MISA SAN FRANCISCO

Siman pasa e misa San Francisco a celebra su 100 aña akinan na Aruba, pa cual ta felicita Pastor y comunidad pa esey. Pa locual ta e trabounan infrastructural cu ta tumando luga conhuntamente cu DOW. Mas o menos dos luna pasa, trabounan a cuminsa rond di e Cathedral San Francisco como parti di elevacion di calidad di bida di hende. Mientras cu ta terminando e prome fase, Minister Oduber a anuncia e inicio di e segundo fase cu ta encera e desaroyo di e parkinglot otro banda di caminda di e misa caminda cu autobusnan ta para. Pa prepara esaki mihor pa e autobusnan por parkeer. Tambe lo percura pa tin espacio cu dak pa esnan cu ta warda bus tambe por sinta mas comodo. Despues lo inicia cu e planificacion di embeyecimento di tur e adernan di caminda cu ta conecta na centro di ciudad. Tur esaki den cuadro di eleva e calidad di bida di nos hendenan. 

OTRO TRABOUNAN

Minister Oduber a splica tambe di otro trabounan tumando luga, manera e misa na Santa Cruz cu a wordo drecha, Misa na Paradera cual ya a inicia cu un destaho y ta calcula cu pa otro siman e trabounan lo inicia cu ta encera e embeyecimento y mehoracion di e infrastructura tur rond di e misa y e parkinglot pa crea mas eficiencia den e trafico. Ademas, e intencion ta tambe pa inicia cu trabounan pronto na Misa Santa Teresita na San Nicolas. Oduber ta splica cu e ta spera cu prome cu fin di aña e trabounan aki ta finalisa.