Ex PG van Dam a anticipa caso Avestruz den NoticiaCla LIVE na april

ORANJESTAD – E caso penal recien di ministerio publico anuncia di Avestruz, a keda anticipa na april di aña caba durante un programa di NoticiaCla LIVE, ora cu e Procurador General di e tempo ey como invitado di e programa, esta Alexander van Dam, a informa cu Landsrecherche a keda reforsa recientemente (e tempo ey) y cu e trabounan (t)a haci pa adkeri informacion necesario pa e siguiente casonan estilo Ibis. Y awor ta asina leu cu e caso ‘Avestruz’ a nace, cu ta enfoca primordialmente riba un ex minister (Benny Sevinger) y un comerciante conoci (L. Arends). 

MAS INVESTIGACION

Tabata despues cu Aruba a conoce e caso di corupcion gubernamental cu e nomber Ibis, unda cu corte a sentencia ex minister Paul Croes na 4 aña di castigo di prison, awor ex PG di Aruba, van Dam, a confirma den e mesun program na april ultimo cu a inicia mas investigacion pa violacion di integridad. Van Dam a confirma cu a acumula suficiente informacion durante e proceso di investigacion di e caso Ibis, cu por a crea mas caso igual, esta p.e. un Ibis, 2 te Ibis 20 den forma di bisa. Mientras cu e no kier a divulga ken(nan) tabata esunnan cu ta investiga actualmente, a admiti cu landsrecherche a keda reforsa recientemente y cu e trabounan ta haci pa adkeri informacion necesario, pa e siguiente casonan estilo Ibis. 

TBO y RST

E informacion cu a start mas investigacion, a bin a base di e pregunta durante e programa di NoticiaCla LIVE en cuestion na april, conduci pa e moderador, Tito Laclé, riba constelacion di e asina yama RST (Recherche Samenwerkings Team) y TBO (Team Bestrijding Ondermijning) na Aruba y si van Dam ta positivo pa bin cu TBO y RST. Esaki ta contrario na pensamento di actual minister di husticia di Aruba, Andin Bikker, cu a bisa NoticiaCla na un ocasion, cu e no ta haya necesario pa tin tanto TBO y RST, pero cu RST so ta suficiente. TBO ta atende e parti di corupcion y ta parti di RST. Sinembargo, como cu Aruba no tin TBO (St. Maarten y Corsou si), den caso di Ibis RST mester a haci e trabou di TBO tambe. “Mi ta na fabor di TBO na Aruba, y esey e minister sa tambe” van Dam a bisa durante e programa. “Nos ta haciendo e mesun investigacion cu TBO ta haci, pero cerca nos RST ta haci esey. Ibis a draai riba RST” van Dam a bisa. 

EXTRA CAPACIDAD

Van Dam a confirma cu RST aworaki a y ta reforsa cu e personanan extra, pa por sigui haci e trabounan investigativo necesario, pa e proximo casonan cu ta na caminda. “E caso Ibis no ta solamente e unico caso (di violacion di integridad). Nos tin hopi mas informacion di violacion di integridad na Aruba. As we speak, nos ta bezig cu esaki y ta informacion cu ta sali di e investigacion Ibis. Awor nos ta sigui cu un otro (caso Ibis)” van Dam a sigui bisa. Segun e ex PG, cu mientrastanto a bandona Aruba, Landsrecherche a laga sa, cu nan no kier tin mas caso di corupcion y como tal kier caba cu tur. Ora cu a puntra PG, si esey kiermen cu tin un Ibis 2 na caminda, van Dam a bisa cu tin asina hopi informacion adkeri, cu por cuminsa un Ibis 2 te 20. Asina hopi informacion tin aworaki e ex PG a bisa. Van Dam sinembargo, no kier a confirma si e caso di Ibis 2 y otronan na caminda, ta trata tambe di otro mandatario of ex mandatario, pero a bisa solamente cu ta trata di ‘diferente caso’. “ Mi kier want’e te eynan” van Dam a sigui bisa e tempo ey.