Prohibicion di Venezuela pa avionnan priva sali for di aeropuerto Maiquetia

ORANJESTAD/MAIQUETIA – Gobierno di Venezuela a pone prohibicion pa avionan priva sali for di e aeropuerto di Maiquetia pa exterior. Esaki a keda confirma pa e director di Universal Aviation na Aruba, Claudio Stamper na NoticiaCla.com aunque e no a haya esaki oficial di gobierno di Venezuela. E la haya e confirmacion di nan oficina di representacion na e aeropuerto. “Nos no sa con largo esaki lo ta, ni pakico a haci esaki” Stamper a bisa NoticiaCla.com. Tampoco e por a confirma si ta pa avionnan priva so of tambe avionnan comercial. No ta conoci pe, si esaki a perhudica avionnan cu tabata programa pa biaha for di Venezuela pa Aruba. “Loke ta confirma ta cu avionnan di Aruba por bula bay Venezuela, pero no por sali mas”. Esaki ta te ora cu e prohibicion termina. Stamper ta premira cu pa mas atardi, e situacion lo por normalisa. Sali for di otro aeropuertonan di e pais si no ta un problema.