Aruba a logra varios medaya den ‘Curaçao Open 2019’ di Karate

ORANJESTAD - Aruba a logra varios medaya den ‘Curaçao Open 2019’ di Karate. Asina Aruba Karate Bond (AKB) ta informa. Segun AKB, cu hopi placer e directiva a ricibi e seleccion di karate na Aruba bek. Ta trata aki di Janilaine Bello, Trinity Meza Orellana y Alejandro Gonzalez Lujan kende a yega contento for di hermana isla, Corsou, despues cu nan a participa na e campeonato yama ‘Curaçao Open 2019’. E campeonato aki tabata uno di hopi accion, unda un total di 10 pais a participa, entre otro Boneiro, Argentina, Martinique y Trinidad. 

E seleccion tabata acompaña pa nan coach, Alberto Gonzalez Lujan, kende ta satisfecho cu e resultado di 4 medaya en total. Janilaine Bello a finalisa cu 1 medaya di plata den categoria ‘kata’ (combate imaginario tecnico). Tambe el a gana 1 medaya di brons den categoria ‘kumite’  (pelea/bringamento). Trinity Meza Orellana a finalisa cu 1 medaya di brons den categoria di ‘kata’. Compañero Alejandro Gonzalez Lujan a finalisa cu 1 medaya di plata den categoria ‘kata’. 

E ekipo di coach, ‘sensei’ Alberto Gonzalez Lujan y ‘sensei’ Luis Escalona ta sigui traha duro cu e seleccion, pa hiba nan pa e siguiente reto.