Parlamento di Aruba a cuminsa trata presupuesto ‘adapta’ 2014

ORANJESTAD – Tratamento di presupuesto adapta di 2014 a cuminsa diahuebs mainta den parlamento di Aruba. Unabes cu e tratamento aki caba, parlamento tin cu dicidi si ta aproba esaki, pa despues wak si gobernador ta firma esaki. Pero prome cu gobernador dicidi, e presupuesto adapta (incluyendo e adaptacion haci) ta bay pa e secretariado di College Financieel Toezicht. Nan ta analisa si gobierno y parlamento a cumpli cu tur e cambionan manera sugeri. E procedura ey ta conforme articulo 2, inciso 5 di e KB cu gobernador a haya mas tempran e aña aki. Despues, nan ta duna nan conseho na gobernador, cu na su turno ta determina si e ta firma esaki of no. Te cu prome cu merdia, tabatin tres orador cu a hiba palabra.